<p>کابل (پژواک، ۴ وږی ۹۹): د کابل پولیس وایي، د سینما لوبغاړې او د کورنیو چارو وزارت کارکوونکې صبا سحر له خپل ساتونکي او موټر چلوونکي سره نن سهار په کابل ښار کې په یوه وسله وال برید کې ټپي شوې ده.</p>
<p>د کابل د امنیې قوماندانۍ ویاند فردوس فرامرز پژواک خبري اژانس ته وویل چې پر صبا سحر برید د کابل ښار د اتمې حوزې اړوند په کارته نو سیمه کې هغه مهال ترسره شو خپل دفتر ته پر لاره وه.</p>
<p>هغه وایي چې صبا سحر له موټر چلوونکي او ساتونکي سره چې په دغه برید کې ټپیان شوي، روغتون ته انتقال شوي او روغتیایي وضعیت یې د ډاډ وړ دی.</p>
<p>فرامرز له جزئیاتو پرته وویل، پر دې سربېره چې سحر هنري فعالیتونه لري، د کورنیو چارو وزارت د ځانګړو قطعو قوماندانۍ په چوکاټ کې هم کار کوي.</p>
<p>د پولیسو د ځانګړو قطعو د بشر حقونو مرستیالۍ د فېسبوک د معلوماتو پر اساس، سمونواله سحر د دغه وزارت د بشري حقونو په برخه کې د ځانګړو قطعو د قوماندانۍ د استازې په توګه کار کوي.</p>
<p>پر سحر د برید مسوولیت تر اوسه چا پرغاړه نه دی اخیستی.</p>
<p>دا په داسې حال کې چې په دې وروستیو کې په کابل کې د خلکو ترور ډېر شوی دی.</p>
<p>د زمري پر لومړۍ نېټه هم د ملي دفاع وزارت یو افسر د کابل ښار د اتمې حوزې اړوند د نامعلومو وسله والو له ووژل شو او تېره اوونۍ د پوهنې وزارت د علمي شورا رییس عبدالباقي امین د کابل ښار د پنځمې حوزې اړوند په موټر کې د ځای پرځای شوی ماین چاودنې له امله ووژل شو او څو نور کسان نو هم په ورته پېښو کې وژل شوي دي.</p>
<p>د یادونې ده، د جنایي جرمونو، هدفي وژنو او ځای پر ځای شوو ماینونو د چاودنو د ډېرېدو پر دوام د کابل امنیه قوماندان له دندې ګوښه او پر ځای یې جمعه ګل همت د امنیې قوماندان په توګه وټاکل شو.</p>
