غزني ښار (پژواک، ٨ مرغومى ٩٩): د غزني امنيتي مسوولين وايي چې ناپېژاندو وسله والو په غزني ښار کې د مستوفيت دوه کارکوونکي پر ډزو وژلي دي.
د غزني د امنيې قوماندانۍ وياند احمد خان سيرت د مرغومي په اتمه پژواک خبري اژانس ته وويل چې نن سهار شاوخوا نهه بجې د غزني ښار د دويمې امنيتي حوزې اړوند د بزازۍ په سيمه کې ناپېژاندو وسله والو د مستوفيت پر کارکوونکو ډزې کړې دي.
هغه وايي چې په دې پېښه کې د مستوفيت دوه کارکوونکي وژل شوي خو وسله وال له سيمې تښتېدلي دي.
ده وويل چې پوليسو د يادې پېښې د عاملينو نيولو لپاره جدي هلې ځلې پيل کړې دي.
دغه راز د بزازۍ سيمې اوسېدونکي نعمت الله پژواک ته وويل چې دغه پېښه د امنيې قوماندانۍ په دوه سوه مترۍ کې رامنځته شوې ده.
هغه وايي: ((امنيې قوماندانۍ ته بېخي نږدې دا پېښه شوې، وسله وال راغلل دوه کسان يې پر ډزو وويشتل او نور له سيمې وتښتېدل.))
د يادونې ده، په دې وروستيو کې د پلازمېنې کابل ترڅنګ په ټولو ولايتونو کې د هدفي وژنو کچه لوړه شوې چې خلک يې سخت اندېښمن کړي دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن