کابل (پژواک، ۸ سلواغه ٩٩): د کابل پولیس وایي چې د دغه ښار د ۹ او ۱۲ ناحیو اړوند په دوو جلا چاودنو کې د پولیسو دوه منسوبین وژل شوي او څلور نور ټپیان شوي دي.
د کابل د امنیې قوماندانۍ ویاند فردوس فرامرز پژواک خبرې اژانس ته وویل چې لومړۍ چاودنه نن سهار شاوخوا ۸ بجې د کابل پولیسو نهمې امنیتي حوزې اړوند دیسپېچري سیمه کې رامنځته شوې ده.
هغه وایي چې په یاده چاودنه کې یو رېنجر موټر د چسپکي ماین هدف ګرځول شوی او په پایله کې یې د پولیسو دوه منسوبین ټپیان شوي دي.
نوموړى دغه راز وايي چې دویمه چاودنه هم نن د دغه ښار د دوولسمې حوزې اړوند سلیم کاروان سیمه کې رامنځته شوې چې په نتیجه کې یې د پولیسو دوه منسوبین وژل شوي او دوه نور ټپیان شوي دي.
تراوسه کومې وسله والې ډلی د دغه برید مسوولیت نه دی منلی.
دا په داسی حال کې ده چې تېره ورځ سهارهم د کابل ښار پنځمې امنیتي حوزې اړوند سيمه کې یو شخصي سراچه موټر د چسپکي ماین هدف وګرځول شو؛ چې یو کس په کې ووژل شو.
د راپورونو له مخې، په وروستیو درېیو میاشتو کې یوازې د سلواغه څلورمه نېټه وه چې په کابل ښار کې د امنیت ضد پېښه رامنځته نه شوه.
Views: 187
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن