کابل (پژواک، ۲۳ غویی ۱۴۰۰): داختر په لومړي ورځ چې ددرې ورځني اوربند لومړۍ ورځ هم وه، په دریو ولایتونو کې د څلورو چاودنو له امله ۲۶ تنو ملکي وګړو ته مرګ ژوبله اوښتې ده.
وسله والو طالبانو د اختر په درېیو ورځو کې د اوربند اعلان کړی و، چې وروسته د افغان حکومت هم ورته اعلان وکړ او ویې چې دوی هم اوربند کوي.
د اوربند په لومړي ورځ لومړۍ چاودنه د کابل په کلکان ولسوالۍ کې وشوه، چې له امله یې د برښنا شرکت یو کارکوونکی ټپي شو.
د برښنا شرکت وایي چې ددوی کارکوونکو هلته د یوې الوځول شوې پر ترمیم بوخت و، چې تیره شپه په چاودنه کې الوځل شوې وه، چې ناڅاپه بله چاودنه وشوه.
دویمه چاودنه په کندوز ولایت کې وشوه، د کندوز ښار څلورمې امنیتي حوزې امر شېراحمد پارسا پژواک خبري اژانس ته وویل چې نن له غرمې مخکې د کندوز ښار په سردورې سیمه کې د ریموټ کنټرول ماین چاودنې دوه ماشومان وژلي او لس نور ملکي وګړي یې ټپیان کړي دي.
د هغه په خبره، د ټپیان په ډله کې هم شپږ ماشومان شامل دي.
تر اوسه د دې پېښې مسوولیت چا نه دی اخیستی خو امنیتي مسوولین دغه کار د وسله والو طالبانو بولي.
بلخوا په کندهار ولایت کې د سړک غاړې ماین په دوو چاودنو کې د ښځو او ماشومانو په ګډون ۷ کسان وژل شوي او ۳ نور ټپيان دي.
لومړۍ پېښه نن له غرمې مخکې د میوند ولسوالۍ په بازار کې رامنځته شوې ده. د کندهار امنیې قوماندانۍ ویاند جمال ناصر بارکزي پژواک خبري اژانس ته وویل، چاودنه د ملکي وګړو پر فیلډر موټر شوې ده چې په موټر کې سپاره پنځه ملکي وګړي وژل شوي چې ښځې او ماشومان هم په کې شامل دي.
دویمه چاودنه د پنجوايي ولسوالۍ په صالحانو سیمه کې شوې ده. بارکزی وايي، چاودنه پر ټکسي موټر شوې ده چې له امله یې ۲ ماشومان وژل شوي او د دوو ماشومانو په ګډون ۳ نورکسان ټپیان دي.
د ده په خبره چې دغه ماینونه د وسله والو طالبانو له خوا ځای پر ځای شوي وو.
طالبانو او دولتي ځواکونو پر یو بل د بریدونو په اړه خبرونه نه دي ورکړي.
Visits: 683
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن