جوزجان کې د پاڅون کوونکو یو قوماندان او زوی یې وژل شوي

شبرغان (پژواک، ۲۸ غویی ۱۴۰۰): په جوزجان کې امنیتي سرچینه وایي چې د طالبانو او پاڅون کوونکو ترمنځ نښته کې د پاڅون کوونکو یو قوماندان او زوی یې وژل شوي او د دې ډلې پنځه تنه نور ټپيان شوي دي.

د جوزجان د ملي امنیت ریاست یوې باوري سرچینې چې یې نه غوښتل نوم یې په راپور کې واخیستل شي، پژواک ته وویل، تېره شپه په فیض اباد ولسوالۍ کې د طالبانو او پاڅون کوونکو ترمنځ سخته نښته وشوه او تر نن سهار پورې یې دوام درلود.

ده زیاته کړه چې په دې نښته کې د اسلام په نوم د پاڅون کوونکو یو قوماندان او زوی یې وژل شوي او د هغه پنځه کسان ټپيان دي.

د سرچینې په خبره، جګړه هغه مهال پای ته ورسېده چې تازه دمي ځواکونه سیمې ته ولېږدول شول.

سرچینې زیاته کړه چې په دې نښته کې طالبانو ته هم تلفات اوښتي خو په اړه یې نور دقیق معلومات نه لري.

د فیض اباد ولسوالۍ د مرکز یوه اوسېدونکي عبدالشکور د دې نښتې  تایید ترڅنګ پژواک ته وویل، له دغسې جګړو سره اوس خلک عادت دي. نوموړي وویل، جګړه سخته وه، ممکن دواړو لورو ته سخت تلفات اوښتي وي.

طالبانو تر اوسه په دې اړه څه نه دي ویلي.