هرات ښار(پژواک، ۱۲ غبرګولی ۱۴۰۰): په هرات کې د شپږ میلیونو ډالرو په لګښت یو پرمختللی مسلخ ګټې اخیستنې ته وسپارل شو.
د هرات لومړنی مسلخ، نن د کرنې وزارت د مرستیال حشمت الله غفوري له لوري په دغه ولایت کې پرانیستل شو.
غفوري وویل چې دغه مسلخ د نړیوال بانک د شپږ میلیونه ډالرو مرستې په لګښت، په څلورو کلونو کې د هرات-اسلام کلا لویې لارې په مسلخ سیمه کې د هرات ښار شمال ته په ۱۰ کیلومترۍ کې په ۲۵جریبه ځمکه کې جوړې شوی دی.
هغه زیاته کړه چې دغه مسلخ په یوه کاري وخت کې د ۱۰۰ غویانو او ۵۰۰ پسونو د حلالولو ظرفیت لري.
هغه وویل چې د دغه مسلخ په جوړېدو سره به په کوڅو او استوګنځایونو کې د هغو څارویو د حلالېدو مخنیوی وشي چې انسانانو ته د حیواني ناروغیو د انتقال لامل ګرځي.
هغه زیاته کړه: «د دغه مسلخ نورې ځانګړنې دا دي چې لابراتوار لري، څاروي له حلالولو مخکې معاینه او ساتل کېږي او وروسته ذبحه کېږي، په لویه سړه خونه کې ساتل کېږي او دغه راز مارکېټونو ته د غوښې لېږدولو لپاره لوی یخچالي موټر هم لري.»
د ده په وینا، په دغه مسلخ کې د څارویو له حلالولو سره سم، پوستکي، وړۍ، هډوکي، ګردې او وینه هم په معیاري ډول مدیریت کېږي.
د هرات والي سید عبدالوحید قتالي خبرداری ورکړ چې د ښار په نورو برخو کې به خپلسرو ذبحو ته اجازه ورنه کړي.
هغه وویل: «نور نه غواړو چې یو شمېر مافیا راشي په ښار او نورو برخو کې دغه مسلخ تحریم او اعتراض وکړي او ووایي چې نه غواړو او نه راځو، هر څه چې د هرات کرنیزه اجماع وي، همغه عملي کېږي.»
د هرات ځینې قصابان هم د دغه ولایت د معیاري مسلخ په ملاتړ وایي چې دا مهال د څاریو ذبحه کول غیرمعیاري دي او روغتیایي ټکو ته پاملرنه نه کېږي.
د هرات ښار یوه قصاب محمود پژواک ته وویل: «له بده مرغه همدا اوس پسونه په معیاري ډول نه حلالېږي او موږ خوښ یو چې دغه مسلخ جوړ شوی څو د خپلسرو ذبحو مخنیو وشي.»
په هرات کې د معیاري مسلخ له ګټې اخیستو سره سم، نن په دغه ولایت کې د کرنې وزارت د مرستیال له خوا د ۱۲۸ میلیونو افغانیو په لګښت د اوبو د مدیریت د ۸ پروژو د بنسټ ډبرې هم کېښودل شوې.
