ګردېز (پژواک، ۲۹ چنګاښ ۱۴۰۰): د افغانستان د ملي دفاع وزارت سرپرست، پکتیا ولایت ته د سفر پر مهال وویل چې دولتي ځواکونه په تعرضي حالت کې دي او امنيتي وضعیت د دولت او خلکو په ګټه د بدلون په حال کې دی.
د ملي دفاع وزارت سرپرست سترجنرال بسم الله محمدي، نن د پکتیا ولایت مرکز ګردیز کې د سوېل ختيځ ۲۰۳ تندر قول اردو ته ولاړ. دا مهال پکتيا، پکتيکا، غزني، لوګر، خوست او میدان وردګ د دغې قل اردو اړوند ولایتونه دي.
د پکتيا د ولايتي شورا مشر عبدالمالک ځاځي په دغه قول اردو کې د محمدي په ګډون جوړه شوې ناسته کې غوښتنه وکړه چې له دې ولايت څخه د ځانګړو ځواکونو او کومانډو تللي کنډکونه بېرته دغه ولایت ته ستانه کړل شي.
ده وویل چې تندر قول اردو بايد خپل هوايي ځواک ولري.
هغه زیاته کړه: “لويې پکتيا په وسله وال پوځ کې تل لويه ونډه لرلې او قربانۍ يې ورکړې. موږ بيا هم د خپل هېواد دفاع ته تيار يو، خو د خپل ولايت او سيمې لپاره خپل حق امکانات غواړو.”
د پکتيا والي ګل نبي احمدزي د طالبانو لاسته د دغه ولایت د نهو لوېدلو ولسوالیو پر بېرته نيولو خبرې وکړې او ويې ويل چې د دې ولايت په ځينو سیمو کې باید د دولت د وسله والو مخالفینو پر وړاندې پوځي عمليات وشي.
احمدزي زياته کړه: “ترورېستان له خپلو بهرنيو ملاتړو سره د ډېورنډ فرضي کرښې په اوږدو کې له ځينو لارو په کار اخیستو د کرښې دې غاړې ته رااوړي؛ د دې لارو تړل ضرور دي.”
د ملي دفاع وزارت سرپرست وویل چې امنيتي ځواکونه په تعرضي حالت کې دي، امنيتي وضعیت د دولت او خلکو په ګټه د بدلون په حال کې دی او په پکتیا کې شته ستونزې به هم له منځه ولاړې شي.
هغه زیاته کړه:”زه تاسو ته ډاډ درکوم، چې د ستونزو د حل په برخه کې له ټول توان څخه کار اخلو. دا زموږ وطن دی او ساتل يې د دې وطن د هر فرد مسوليت دی. طالب ته هېڅ ډول ملي او ديني مشروعيت او حیثيت نه دی ورپاتې.”
د ده په وینا، د افغانستان وسله وال پوځ خپل ځواک د سولې او ثبات لپاره کاروي او حکومت په دې برخه کې د جدي لارو، چارو پر پلې کولو بوخت دی.
دی وایي:”الله له موږ سره دی. د وسايلو په دنيا کې د بهرنيانو او نړۍ پوره همکارۍ راسره ده، په اکمالاتو کې ستونزه نشته. د هوايي ځواک لپاره هم ځينې هليکوپترې راغلې او نورې هم راځي. موږ د نړۍ په مخ کې د ترورېزم پر وړاندې جنګيږو. ترورېزم، ترورېستان او ملاتړي يې اوس ټولو ته معلوم دي.”
دا په داسې حال کې ده چې په تېرو شاوخوا دوو نیمو میاشتو کې د دولت وسله والو مخالفینو بریدونه ډېر کړي او په د هېواد په بېلابېلو ولایتونو کې یې شاوخوا ۱۸۰ ولسوالۍ نیولي دي.
Visits: 63
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن