شبرغان (پژواک، ۹ زمری ۱۰۰): د جوزجان ملي امنیت ادعا کوي چې د طالبانو پر کاروان د حکومتي ځواکونو په هوایي برید کې د دې ډلې ۲۵ کسان وژل شوي او ۱۲ نور ټپيان شوي، خو طالبان خپلو کسانو ته د مرګ ژوبلې یاده شمېره ناسمه بولي.
د جوزجان ولایت د ملي امنیت ریاست په یو خپره شوې خبرپاڼه کې ویلي چې طالبانو پرون ماښام د له سرپله د مرستندوی ځواکونو غوښتلو ترڅنک غوښتل چې پر شبرغان ښار برید وکړي.
سرچینې زیاته کړه چې د طالبانو مرستندوی کسان امنیتي کمربند ته نږدې د هوایي ځواکونو تر برید لاندې راغلل چې په پایله کې ۲۵ کسان ووژل شول او ۱۲ نور ټپيان شول.
په خبرپاڼه کې راغلي چې په دغه برید کې د هغوی پنځلس موټرسایکلونه هم تخریب شوي او د وژل شوو کسانو جسدونه تر نیمې شپې په سیمه کې پاتې وو.
سرچینې زیاته کړې ده چې د دغه برید له امله طالبانو ونه شو کړای چې خپل عملیاتي پروګرام عملي کړي او نن هم د شبرغان ښار په څنډو کې د هغوی مورچې تر هوایي بریدونو لاندې دي.
د حسن تابین کلي یوه اوسېدونکي محمد نسیم وویل: «زموږ په کلي کې اصلاً څوک پاتې نه دي، موږ کله کله د احوال اخیستو په موخه له خپلو کورونو کلي ته ځو.»
هغه زیاته کړه طالبان چې کله د هوایي ځواکونو تر برید لاندې نیول کېږي، د پېښې ساحې څوک نه پرېږدي، څو خلک یې د کسانو د وژلو شاهد ونه اوسي.
نوموړي وویل چې طالبانو خالي کورونه سنګرونه ګرځولي او د کورونو دېوالونو یې یو بل ته سوري کړي دي.
ده وویل چې د دواړو لورو ترمنځ د جګړې له امله د استوکنو کورونو ځينې برخې تخریب شوې دي او دغه پروسه لا روانه ده.
هغه په ډاګه کړه چې د مرغاب، غوره، حسن تابین، کهلک، سه شنبې، افغان تپه، منګوتي او د عیدمه کلا کلیو اوسېدونکو یا د شبرغان ښار ته پناه وړې یا نورو ولایتونو ته تللي دي.
د طالبانو ویاند ذبیح الله مجاهد د شبرغان ښار په امنیتي کمربند کې د طالبانو پر کاروان برید تاييد کړ خو ویې ویل چې په دغه برید کې د دوی یو کس وژل شوی او درې نور ټپيان دي.
ده زیاته کړه، د دولت دغه ادعا چې ګواکې ډېر طالبان وژل شوي، ناسمه ده.
