کندوز ښار (پژواک، ١٣ وږى ١٤٠٠): په کندوز کې د خبريالانو د خونديتوب کمېټه وايي چې د نظام له تغيیر وروسته طالبان په دغه ولايت کې د رسنيو ښځينه کارکوونکو ته د فعاليت کولو اجازه نه ورکوي.
په کندوز کې د خبريالانو د خونديتوب کمېټې مسوول شهباز صابري د وږي په ١٣مه پژواک خبري اژانس ته وويل چې په دغه ولايت کې له دوو رسنيو پرته نورو ډېرو رسنيو خپلې خپرونې ځنډولې دي.
دى وايي چې پخوا د دغه ولايت په رسنيو کې شاوخوا پنځوسو ښځينه کارکوونکو دندې ترسره کولې، خو د طالبانو له راتګ سره دغه ښځې دندو ته نه حاضريږي.
دى وايي: ((طالبانو رسنيو ته ويلي چې هم بايد موسيقي بنده کړي او هم بايد ښځينه کارکوونکې ونه لري.))
همدارنګه د يوې رسنۍ کارکوونکې د نوم نه خپرولو په شرط پژواک ته وويل چې طالبان ورته په رسنيو کې د کار کولو اجازه نه ورکوي.
دې وويل: ((طالبان موږ نه پرېږدي چې دفتر ته لاړې شو، که موږ ته اجازه راکړي حاضر يو چې په اسلامي حجاب کې دندو ته لاړې شو، خو بايد د کار کولو حق له موږ څخه وانخلي.))
په ورته وخت کې په دغه ولايت کې د روشني تلوېزيون مسوول عبيدالله قاضي زاده پژواک ته وويل چې د مالي امکاناتو د نشتون له امله يې خپله رسنۍ تړلې ده.
هغه زياته کړه: ((مخکې موږ اعلانونه درلودل، ځینې پروژې به مو هم ترلاسه کولې، خو اوس دا هیڅ هم نه شته دى نو موږ نه شو کولاى چې فعاليت وکړو.))
د يادو څرګندونو په اړه په کندوز کې د اسلامي امارت د اطلاعاتو او کلتور رييس مطيع الله روحاني پژواک ته وويل چې د رسنيو د فعاليت په پر وړاندې هیڅ ډول خنډ نه شته دى او دوى کولاى شي خپرونې وکړي.
هغه وايي: ((ټولې رسنۍ بايد د اسلام د مقدس دين په چوکاټ کې فعاليت وکړي، خو د ښځينه کارکوونکو د کار کولو په اړه له مرکز څخه بايد موږ ته هدايت راکړل شي بيا هماغه شان عمل کوو.))
د يادونې ده چې د اسلامي امارت له راتګ وړاندې په کندوز کې درې خصوصي او يو دولتي تلوېزيون او لسو راډيوګانو فعاليت درلوده، خو اوس ډېرى يې تړل شوي دي.
