کندهار(پژواک، ۱۲ مرغومی۱۴۰۰): د کندهار صنعتکاران وایي چې په دغه ولایت کې ډېری فابریکې د برېښنا نه شتون له امله بندې شوې او کم شمېر يې فعالې او له تېلو کار اخلي.
په کندهار کې د صنعتکارانو د اتحادیې رييس فضل الحق مشکاني پژواک خبري اژانس ته وویل چې په دغه ولایت کې یوازې په صنعتي پارک کې شاوخوا ۳۵۰ فابریکې شتون لري چې یوازې د ګوتو په شمېر يې فعالې او نورې ټولې بندې شوې.
نوموړی وايي چې صنعت کاران او مسوولین د برېښنا د ستونزې د حل په موخه هڅې کوي خو تر اوسه یې کومه حل لاره نه ده ورته موندلې.
صنعتکاران وایي، که څه هم د برېښنا ستونزه له ډېر پخوا څخه په کندهار کې پر ځای پاتې ده، خو دوی تمه لري چې اوس دغې ستونزې ته دایمي حل لار ولټول شي.
د یوې فابریکې مسوول حیات الله وايي چې پخوا دولت هم د تېلو مرسته ورسره کوله او هم يې برېښنا ورته برابروله، خو د نوي حکومت په راتګ سره برېښنا په ټپه درېدلې ده.
دی وايي چې د تېلو بيې لوړې شوې او صنعتکارانو خپلې ډېری فابريکې تړلې او له امله يې زرګونه کسان وزګار شوي دي.
د کندهار د سوداګرۍ خونې رییس حاجي نصرالله زهیر هم وایي چې د صنعت پر وړاندې درې لويې ستونزې پرتې دي، لکه د برېښنا نه شتون، د تېلو لوړه بیه او په بانکونو کې د سوداګرو د پيسو بند پاتې کېدل.
هغه پژواک اژانس ته وویل چې ډېری فابريکې بندې شوې او هغه چې فعالې دي هغوی خپل کارکوونکي له شل څخه تر دېرش سلنه پورې کم کړي.
دی وایي، له برېښنا وروسته بله لویه ستونزه دا هم ده چې سوداګر د خامو موادو واردولو لپاره له بانکونو څخه ډېرې پيسې نه شي ترلاسه کولای چې دې کار یوازې پر صنعت نه، بلکې پر سوداګرۍ يې لوی اغېز کړی.
د کندهار د برېښنا رییس مولوي محمد حنیف حمزه بيا وایي چې اوس مهال برېښنا ځکه کمه شوې چې په کجکې بند کې اوبه کمې دي او یوازې یو توربین فعال دی.
هغه پژواک اژنس ته وویل، اوس مهال له کجکي څخه یوازې شپږ یا اووه میګاواټه برېښنا کندهار ته راځي چې دا ډېره کمه ده.
دی وایي چې دلته ۳۲ میګاواټه د سولر برېښنا هم شته، خو دا برېښنا د فابریکو لپاره کار نه کوي، نو ځکه فابریکې اوس مهال بې برېښنا دي.
هغه زیاته کړه چې دوی له صنعتکارانو سره مجلسونه کړي او د هغوی ستونزه پر ځای بولي او وايي، مرکز ته يې هم په دې اړه خبر ورکړی.
دی وايي هڅه کوي چې د کندهار د فابریکو لپاره د برېښنا ستونزه حل کړي که د تېلو یا هم نورو لارو څخه وي تر څو دلته فابریکې فعالیت زیات کړي.
که څه هم په تېرو کلونو کې د کندهار د برېښنا لپاره زیاتې پیسې لګول شوې خو کندهار چې یو لوی ولایت دی لا هم د برېښنا له ستونزې سره مخ دی.
