د نورستان ډېرې سیمې لا هم له مخابراتي خدماتو بې برخې دي

پارون (پژواک، ۲۵ سلواغه ۱۴۰۰): د نورستان ولايت خلک او حکومتي چارواکي وايي چې لا هم د ياد ولايت ډېرې سيمې د مخابراتي شبکو له پوښښه بې برخې دي.

د دغه ولايت د کامدېش ولسوالۍ اوسېدونکي عبدالناصر پژواک خبري اژانس ته وويل چې د دوی په سيمه کې هيڅ مخابراتي شبکه کار نه کوي، له همدې امله خلک د خپلوانو او ان کورنۍ غړو له جنازو او نورو مهمو پېښو نه خبرېږي.

هغه وايي چې کورنۍ يې د کامدېش په پيرستان کلي کې ده، خو دی د نورستان په مرکز پارون کې اوسېږي.

دی زياتوي چې څو ورځې وړاندې يې تره وفات شوی و، خو دی ترې خبر نه شو، نو ځکه يې د جنازې مراسمو ته ور ونه رسېد.

د يادې ولسوالۍ د پتي ګل کلي اوسېدونکی ميرافضل چې اوس د دغه ولايت د مالي او اداري رياست مالي امر په توګه دنده ترسره کوي، وايي چې د مخابراتي ستونزو له امله دی په دفتري کارونو کې له ستونزو سره مخ دی؛ ځکه چې د دغه ولایت په مخابراتي شبکو کې انټرنېت نهايي کمزوری دی، له همدې له امله ځینې ایمیلونو ته پر وخت ځواب نه شي ورکولای.

د دغه ولايت د نورګرام ولسوالۍ اوسېدونکی صدیق الله صديقي پژواک ته وويل چې د دوی د ولسوالۍ ۶۰ سلنه سيمه کې مخابراتي خدمات نشته.

دی وايي چې يوازې په کله ګوش او ننګراج سيمو کې افغان بېسيم شبکه فعاليت کوي.

د منډول ولسوالۍ د انىش کلي اوسېدونكی او قومي مشر محمد رسول ساجد وايي چې د دوی د ولسوالۍ  له شاوخوا ۸۰ کليو څخه يوازې دوو کلیو (باندول او انيش) کې د افغان بېسیم شبکه کار کوي.

د کامدېش ولسوالۍ د میردېش کلي اوسېدونکي او ديني عالم مولوي عثمان پژواک ته وويل، دا چې د دوی په ولسوالۍ کې مخابراتي شبکې فعاليت نه کوي، خلک د اړيکو نيولو په برخه کې له ستونزو سره مخ دي.

دی زياتوي چې نږدې اووه میاشتې وړاندې د شپې په تیاره کې د دوی پر کلي سېلاب راغی او د ښځو او ماشومانو په ګډون یې نږدې ۱۵۰ کسان لاندې کړل.

هغه زیاتوي چې دغه سېلاب له لرې سيمې څخه سرچینه اخیستې وه او هلته خلکو لیدلی و، خو دا چې مخابراتي شبکو فعاليت نه درلود، نو د دوی سيمې خلکو ته يې د سېلاب د خطر په اړه خبر نه و ورکړی.

دی وايي چې که د دوی د سيمې خلک د سېلاب له خطره مخکې خبر شوي وای، نو دغه لویه انساني غميزه نه رامنځته کېده.

هغه له حکومته غواړي چې په ياده ولسوالي کې  دې د مخابراتي شبکو فعاليت ته زمينه برابره کړي.

د نورستان د وایګل ولسوالۍ د لوی وایګل کلي اوسېدونکي نسیم چې د دغه ولايت په مرکز پارون کې په نظامي برخه کې دنده لري، پژواک ته وويل چې د دوی په ولسوالۍ کې مخابراتي شبکې کار نه کوي او د خپل کلي له ښو او بدو پېښو حال نه لري.

دی وايي چې دوی اوس هم د ليک لېږلو له لارې د خپلو خپلوانو حال اخلي، په داسې حال کې چې ډېری خلک ليک لوست هم نه لري او له بل چا مرسته غواړي.

نوموړي هم له حکومته وغوښتل چې د دوی په ولسوالۍ کې دې مخابراتي شبکې فعالې کړي.

د دغه ولايت د برګمټال ولسوالۍ اوسېدونکی صبعت الله وایي چې پخوا د دوی په ولسوالۍ کې د افغان ټيلي کام شبکې فعاليت کاوه، خو اوس غير فعالې شوې او دغه ولسوالي د مخابراتي له خدمتونو څخه په بشپړ ډول بې برخې ده.

بلخوا د نورستان د مخابراتو او معلوماتي ټیکنالوجۍ رییس مولوي احمد خالد فاتح هم پژواک ته ومنله چې د دغه ولايت ډېرې سيمې د مخابراتي شبکو له پوښښه بې برخې دي.

خو ده زياته کړه چې حکومت د يادې ستونزې د حل لارې پيدا کولو لپاره هڅې روانې کړې.

هغه وويل چې دوی د ۱۴۰۱ کال لپاره پر یوه پلان کار کوي چې لسمه پروژه نومېږي چې د هغې په عملي کېدو سره به د مخابراتي شبکو ستونزې تر ډېره حل شي.

د ياد ولايت د اترا مسوول انجنیر عبیدالله ساپي هم پژواک  ته وويل چې دغه ولایت ته د نوري فايبر په رسېدو سره به د مخابراتو او انټرنېټ په برخه کې شته ستونزې را کمې شي.

دی دغه راز وايي چې اوس له افغان بیسم مخابراتي شرکت سره د دوی خبرې روانې دي چې د نورګرام ولسوالۍ د ملیل او مشفې سيمو له لارې د دغه ولايت له مرکز پارون سره د مخابراتي پوښښ لپاره وصل کړي.

خو زياتوي چې دغه کار هم وخت او هم د ډېرو مخابراتي سايټونو فعالېدو ته اړتيا لري.

نوموړی وايي چې د نورستان ولایت جغرافیايي موقعیت هم د مخابراتي ستونزو لوی لامل دی او په خبره يې چې لسمه پروژه چې د اترا ادارې له انکشافي بودجې څخه تمويلېږي، د خلکو ستونزو ته پکې پام شوی راتلونکی لمريز کال به عملي شي.

نوموړی تاييدوي چې د نورستان شپېته سلنه وګړي د مخابراتي شبکو له خدماتو بې برخې دي.

ساپی وايي چې د خلکو ستونزې يې د ولايت د مقام په همغږۍ له مرکز سره شريکې کړې او هيله ده چې د حل لار ورته ولټول شي.