کندهار (پژواک، ۱۷ کب ۱۴۰۰): په کندهار کې د زینتې مرغانو پلورونکي وایي چې په هېواد کې له کابو شپږو مياشتو راهيسې د دوی کاروبار کمرنګه شوی او د مرغانو مينه وال کم شوي دي.
د کندهار ښار د کابل بازار یوه څنډه چې د زینتي مرغانو د پلور ځای دی، ډېری کسان په کې مرغان پلوري.
د مرغانو یو پلورونکی محمد صادق وايي چې د دوی کار د پخوا په نسبت ډېر کمرنګه شوی دی.
دی زياتوي چې د مرغانو ډېری مينه وال يا له کندهار څخه وتلي او يا يې دغه شوق ته شا کړې ده.
ده وویل، پخوا چې به یوه کس پر یوه کنري څلوېښت زره افغانۍ ورکولې، اوس لس زره افغانۍ هم نه ورکوي؛ ځکه پيسې نشته.
دی وايي: "پخوا د مرغانو کاروبار ډېر ښه و، خو اوس په سلو کې نوي لوېدلی دی."
د مرغانو په دغه بازار کې زرکان، کنري او واټر مرغۍ، بلبلان، طوطیان او ډول ډول نور مرغان شته چي ځيني يې له بهر هېوادونو راوړل کېږي او ډېر يې خپله دلته خلک روزي او بیا یې پلوري.
د مرغانو یو بل پلورونکی عبدالله وایي چې پخوا له بهرنیو هېوادونو هم ډېر شمېر زینتي مرغان راتلل، خو اوس په لارو کې د ستونزو له امله بهرني مرغان نه راوړل کېږي.
دی وايي، د کاروبار له خرابېدو سره یې ګټه هم کمه شوې او ډېری وخت د دوکان کرایه هم نه شي جوړولای.
هغه زیاته کړه: "پخوا په دغه کاروبار کې ډېر خلک اخته و، خو اوس مرغان نه خرڅېږي، پخوا چې به موږ په میاشت کې لس زره یا شل زره ګټلې، اوس په دوو یا درېیو میاشتو کې هم لس زره نه شو کټلای."
د مرغانو یو پلورونکی محمد اسلم وایي، پخوا چې به یو مرغه په ۱۵زره افغانۍ پلورل کېده، اوس یې بیه شپږ زره افغانیو ته راکښته شوې چې له دې سره د مرغانو پلورونکي هم زیانمن شوي دي.
عبدالرحمن بیا یو هغه تنکی ځوان دی چې له ماشومتوبه کوترې په کور کې ساتي او بیا یې په بازار کې پلوري.
دی وايي، پخوا یې ډېرې پيسې په کې ګټلې خو اوس د دوه سوه افغانیو کوتره په ۱۰۰ یا ۱۲۰ افغانۍ پلوري.
د زینتي مرغانو د پلور برعکس بیا د کورنیو چرګانو پلور زیات شوی او د کندهار د بېلابېلو ولسوالیو اوسېدونکي ښار ته چرګان او فلمرغان د پلور لپاره راوړي.
غړيYou need to subscribe to view the full article. Please login or register a new account.
