اروزګان کې د یوې روغتیاپالې مړی موندل شوی

[restrict paid="true"]

<p style="text-align: justify;">ترینکوټ (پژواک، ۲۵ غبرګولی ۱۴۰۱): د اروزګان مسوولین وایي، نن سهار د دغه ولایت په دهراوود ولسوالۍ کې د یوې قابلې مړی د هغې په خپل استوګنځي کې پیدا شوی دی.</p>

<p style="text-align: justify;">د اروزګان د عامې روغتیا ریاست یوې باوري سرچینې پژواک خبري اژانس ته وویل، دې قابلې د دهراوود ولسوالۍ په دېوانه‌ورخ سیمه کې په یوه سیمه‌ییز روغتیايي کلینیک کې دنده درلوده.</p>

<p style="text-align: justify;">سرچینه وایي، هغوی ته رسېدلي لومړني معلومات ښيي چې دې قابلې په خپل کور کې د «ډیکسوز» په نوم سیروم د تطبیق پرمهال حساسیت ښودلی او ژوند یې له لاسه ورکړی دی.</p>

<p style="text-align: justify;">سرچينه زياتوي، له هغې سره په کور کې یو کس چې ورور یې کېږي، هم د محرم په توګه اوسېده؛ خو سیمې ته رسېدلی د هغوی د روغتیایي ټیم له خوا د قابلې پر جسد او د پېښې په سیمه کې داسې نښې نښانې نه دي لیدل شوي چې دا وژنه دې قصدي شوې وي.</p>

<p style="text-align: justify;">د سرچینې په وینا، د پېښې د لا څېړنې لپاره د ولسوالۍ اړوند کشفي او امنیتي ځواکونو ته دوسیه سپارل شوې او وروسته به د وژنې اصل لامل معلوم شي.</p>

<p style="text-align: justify;">یوې بلې باوري سرچینې پژواک ته وویل، له قابلې سره اوسېدونکی کس چې د هغې ورور دی، په نشه‌یي توکو روږدی دی.</p>

<p style="text-align: justify;">امنیتي مسوولین هم وایي چې د اروزګان په دهراود ولسوالۍ کې د یوې روغتیاپالې مړی د هغې د اوسېدو په خونه کې پیدا شوی دی.</p>

<p style="text-align: justify;">د امنیې قوماندانۍ ویاند قاري اغاولي قریشي وایي، د دې پېښې په تړاو تر دې مهاله یو شکمن ډاکټر -چې په یاد سیمه‌ییز کلينیک کې یې دنده درلودله - نیول شوی او د څېړنو لپاره اړوندو ارګانونو ته سپارل شوی دی.</p>

<p style="text-align: justify;">دی زياتوي، تر دې مهاله معلومه نه ده چې د قابلې د مړينې اصلي لامل به څه وي، خو د کره‌والي لپاره یې هڅې روانې دي.</p>

<p style="text-align: justify;">دوه کاله وړاندې هم د اروزګان مرکز ترینکوټ کې یوه قابله د خپل خاوند له خوا حلاله شوې وه.</p>

[/restrict]