په بامیان کې د غالۍ‌اوبدلو پروژې له لارې سلګونه ښځو ته د کار زمینه برابره شوې ده

[restrict paid=”true”]

بامیان (پژواک، ۲۹ غبرګولی ۱۴۰۱): په بامیان کې د اې. سي. اي. بي. اې موسسې د غالۍ‌اوبدلو یوې پروژه کې ۵۵۰ ښځو ته د کار زمینه برابره کړې ده.

 (ACEBA) یوه داخلي موسسه ده چې د افغانستان د صادراتي فعالیت په اډانه کې د سوداګریزو فعالیتونو رقابتي کولو پروګرام کې کار کوي.

د «بومي پرنډ» په نوم غالۍ اوبدلو شرکت مسوول عبدالله ابراهيمي چې د يادې پروژې د تطبیق چارې پر غاړه لري، پژواک خبري اژانس ته وويل، که په دې برخه کې زياته لېوالتيا رامنځته شي، نو دوى به خپل فعاليت پراخ کړي او نارينه به هم تر پوښښ لاندې راولي.

هغه زیاته کړه: «دغه پروژه د ACEBA موسسې په مرسته او تمویل، مېرمنو ته د غالۍ اوبدلو حرفوي زده کړو او کار پیدا کولو په برخه کې په پام کې نیول شوې ده ‎چې دا مهال په شپږو جلا مرکزونو کې ۵۵۰ نوې مېرمنې د دې پروګرام تر پوښښ لاندې دي.»

د یاد پروګرام ډېرې ګډونوالې هغه نجونې دي چې له ښوونځي محرومې او د بېوزلۍ له امله یې غالۍ اوبدلو ته مخه کړې ده.

د يوولسم ټولګي زده کوونکې ۱۹ کلنه نجيبه چې په دې پروژه کې يې برخه اخيستې وايي، غواړي له مور او پلار سره د کورنۍ په لګښتونو پوره کولو کې مرسته وکړي.

هغې وویل: «زما مور او پلار د بېکارۍ له امله نه شي کولای د خپلې کورنۍ لګښتونه پوره کړي؛ د ښوونځيو په تړل کېدو سره موږ اړ شوو چې په دې پروګرام کې ګډون او د ژوند د لګښتونو په برخه کې له خپلې کورنۍ سره مرسته وکړو.»

د باميان بلې اوسېدونکې ليلا پژواک ته وويل، هيله منه ده چې د غالۍ اوبدلو په حرفه‌یی زده کړو سره وکولای شي د ځان او خپلې کورنۍ راتلونکې اړتياوې پوره کړي.

یادې مېرمنې ‎په دغه مرکز کې هره ورځ اته ساعته کار کوي چې د یادې موسسې له لوري هر شاګرد ته د ترانسپورټي لګښتونو، خوړو او کرایې سربېره، د میاشتې ۱۲ زره افغانۍ معاش هم ورکول کېږي.

[/restrict]