<p style="text-align: justify;">کابل (پژواک، ۱۱ چنګاښ ۱۴۰۱): ترکیه وایي، هغه ۱۳۶ افغان ګډوال بېرته افغانستان ته لېږي چې په ناقانونه ډول دغه هېواد ته ورغلي دي.</p>
<p style="text-align: justify;">دغه څرګندونې نن (د چنګاښ ۱۱مه) د ترکيې پوليسو د دغه هېواد اناتولي خبري اژانس ته کړې دي.</p>
<p style="text-align: justify;">د اناتولي اژانس د راپور له مخې، د ترکیې پولیسو اعلان کړی: «۱۳۶ ناقانونه افغانان د امنیتي تدابیرو په لړ کې له قرقلرایلي څخه د کوجالي هوایي ډګر ته انتقالېږي او بیا به په الوتکه کې افغانستان ته ولېږل شي.»</p>
<p style="text-align: justify;">سرچینې د ترکیې د پولیسو له قوله لیکلي: «د هغو ناقانونه کډوالو بېرته ستنولو لپاره چې په بېلابېلو نېټو نیول شوي او د لنډ مهال لپاره د ترکیې د بهرنیو اتباعو بېرته ستنولو په مرکزونو کې مېشت دي، د بېرته ستنولو لپاره یې هڅې روانې دي.»</p>
<p style="text-align: justify;">د دغه اژانس په یو بل راپور کې راغلي چې ترکیې د بهرنیو هېوادونو ۲۷۲ ناقانونه ګډوال بېرته خپلو هېوادونو ته ستانه کړي دي.</p>
<p style="text-align: justify;"></p>
