د تخار له کوکچې پورې غاړې ولسوالیو اوسېدونکي له «فورجي» انټرنټي خدمتونو برخمن شول

تالقان (پژواک، ۲۷ کب ۱۴۰۱): د پژواک خبري اژانس له لوري، د تخار له کوکچې پورې غاړې ولسوالیو کې د ټولنیزو ستونزو په ځانګړې توګه د انټرنیټي خدمتونو د فعالیت نشتوالي په اړه د څو راپورونو له خپرولو سره سم، اوس د افغان بیسیم مسوولین په دغو ولسوالیو کې د انټرنیټي خدمتونو له فعالېدو خبر ورکوي چې د خلکو له تاوده هرکلي سره مخ شوی دی.

د افغان بیسیم مخابرتي شرکت د شمال‌ختیځ زون امر خیرمحمد مبارز پژواک خبري اژانس ته وویل، د خلکو ستونزو ته د رسېدو لپاره یې په دې وروستیو کې له کوکچې پورې غاړې څلورو ولسوالیو کې د «4G» انټرنټي خدمتونه فعال کړي دي.

هغه زیاته کړه، د یاد شرکت د ټوجي او تري‌جی (2G او 3G) خدمتونه د تخار په ګډون د شمال‌ختیځ څلورو ولایتونو په ټولو ولسوالیو کې فعال دي او هڅې روانې دي چې په را روان کال کې د دغو ولایتونو په ټولو ولسوالیو کې فورجي خدمات هم فعال کړي.

د تخار له کوکچې پورې غاړې ولسوالیو اوسېدونکي -چې له دې وړاندې یې د مخابراتي خدمتونو له نشتوالي شکایت درلود- وایي، له هغې وروسته چې د پژواک په ګډون د څو رسنیو له خوا په دې اړه راپورونه خپاره شول، اوس له فورجي انټرنټي خدمتونو څخه برخمن شول.

د تخار له کوکچې پورې غاړې ولسوالیو یوه مدني فعال صدرالدین وویل: «خلک په دغو ولسوالیو کې د لسګونو محرومیتونو ترڅنګ له انټرنټي خدمتونو څخه هم محروم وو، اوس د افغان بیسیم شرکت له خوا د فورجي انټرنټي خدمتونو په فعالولو سره په دې برخه کې د خلکو ستونزې تر یوه بریده حل شوې.»

هغه زیاتوي، له دې وړاندې د انټرنټي خدمتونو نشتوالي له امله له هېواده بهر یا په نورو ولایتونو کې له خپلو کورنیو سره په اړیکه نیولو کې له ستونزو سره مخ وو.

د هغه په وینا، د ځینو رسنیو له خوا د یادې ستونزې په اړه د راپورونو خپرول هم اغېز درلود.

نوموړي هیله وښوده چي یاد خدمتونه دوامدار وي څو ځايي خلک بیا له ستونزو سره مخ نه شي.

د تخار د خواجه‌غار ولسوالۍ اوسېدونکی قاري علاءالدین وایي: «په دې وروستیو کې د افغان بیسیم د فورجي انټرنټي خدمتونه فعال شوي خو کمزوري دي، موږ هیله‌مند یو چې دغه ستونزه همېشنۍ نه وي.»

هغه زیاتوي، د انټرنیټ کمرزوۍ له امله خلک له ستونزو سره مخ وو، اوس خوښ دي چې له کوکچې پورې غاړې ولسوالیو کې له فورجي خدمتونو برخمن شول.

دا په داسې حال کې ده چې له دې وړاندې د تخار له کوکچې پورې غاړې ولسوالیو اوسېدونکو د انټرنټي خدمتونو له نشتوالي شکایت درلود.