<p style="text-align: justify;">فراه (پژواک، ۱۱ وږی ۱۴۰۲): د فراه مسوولین وايي، د دغه ولایت په مرکز کې د ۶۲ ميليون افغانيو په ارزښت د صحي اوبو یوه شبکه جوړه شوه.</p>
<p style="text-align: justify;">د کلیو د پراختيا او بیارغونې رییس محمد نسیم سرهنګ وویل، دغه شبکه د فراه ښار د مهاجرينو په ښارګوټي کې د شپږو مياشتو په موده کې جوړه شوې چې ۶۰۰ متره مکعب اوبه ذخيره کوي.</p>
<p style="text-align: justify;">ده زياته کړه، دغه شبکه د دوو ژورو څاګانو په لرلو سره د سولر په وسیله په يوه وخت کې ۱۰۹۷ کورنيو ته د څښاک اوبه برابروي.</p>
<p style="text-align: justify;">د هغه په وینا، دا پروژه د یونیسف موسسې (د ماشومانو ملاتړ صندوق) په مالي مرسته د ډاکار موسسې په تخنیکي همکاری سره جوړه شوه.</p>
<p style="text-align: justify;">د یاد ښارګوټي اوسېدونکي خوښ دي او وایي چې تر دې وړاندې یې د څښاک اوبه نه درلودې. دوی به اوبه له نورو سیمو څخه راوړې، خو اوس يې دغه ستونزه هواره شوه.</p>
<p style="text-align: justify;">د ښارګوټي استازی عبدالوکیل وایي: "موږ ډېر خوشاله یو چې نن موږ ته دا شبکه فعاله شوه، د اوبو د نیستۍ له امله ډېر کلیوال کډه شوي وو، اما اوس بېرته خلک خپل ځای ته راغلي دي."</p>
<p style="text-align: justify;">نوموړی زیاتوي، دا چې په سیمه کې يې مخکې اوبه نه وې، نو اوس ډېر خوښ دي، ځکه هر کور ته نل غځېدلی دی.</p>
