په څه باندې اوو میاشتو کې لسګونه سیلانیانو له غور ولایته لیدنه کړې ده

فېروزکوه (پژواک، ۲۹ لړم ۱۴۰۲): د غور د اطلاعاتو او فرهنګ ریاست وايي، له څه باندې اوو میاشتو راهیسې ۶۰۰ کورنیو او بهرنیو ګرځندویانو دغه ولایت ته سفر کړی دی.

د غور ولایت د اطلاعاتو او فرهنګ رییس مولوي عبدالحی پژواک خبري اژانس ته وویل: «غور ولایت ته د راغلو ۶۰۰ سیلانیانو له ډلې ۱۶۹ یې بهرني او پاتې نور یې داخلي ګرځندویان دي.»

هغه غور ولایت ته د ورتلونکو سیلانیانو شمېر مخ په ډېرېدو وباله او ویې ویل، ګرځندویانو له بېلابېلو هېوادونو دغه ولایت ته سفر کړی او له تاریخي ځایونو یې لیدنه کړې ده.

د سرچینې د معلوماتو له مخې، په تېر کال کې ۷۲ سیلانیانو له دغه ولایته لیدنه کړې وه، شته شمېرې ښیي چې دغه ولایت ته د ورتلونکو ګرځندویانو شمېر د تېر کال پر پرتله ۵ برابره ډېر شوی دی.

هغه په ټینګار سره زیاته کړه: «په هېواد کې د افغانستان د اسلامي امارت له بریالي کېدو وروسته دغه ولایت ته ډېر شمېر کورني او بهرني سیلانیان راغلي او د جام منار او نورو تاریخي ځایونو یې لیدنه کړې چې په ریښتیا هم دغه ولایت کې د تېر په پرتله د سیلانیانو شمېر ډېر شوی دی.»

نوموړي څرګنده کړه چې د دغه ولایت اطلاعاتو او فرهنګ ریاست تل هڅه کړې چې سیلانیانو ته لا زیاتې اسانتیاوې برابرې کړي څو وکولای شي دغه ولایت ته ارام سفر وکړي.

د سرچینې د معلوماتو پر بنسټ، په غور کې څه باندې ۶۰۰ تاریخي ځایونه شته چې له دې ډله یې ۳۷۰ ځایونه د دغه ولایت د اطلاعاتو او فرهنګ ریاست د فرهنګي میراثونو د ساتنې له مدیریت سره ثبت او راجستر شوي دي.