مسوولین: د ځمکې لاندې اوبو ډېرېدو لپاره د بدخشان په ځینو ولسوالیو کې چک‌ډیمونه جوړیږي

فیض‌اباد (پژواک، ۱۴ لېندۍ ۱۴۰۲): بدخشان کې ځايي مسوولین وايي چې د ځمکې لاندې اوبو پیاوړتیا او د سېلابونو د تخریباتو مخنیوي لپاره ‎د دغه ولایت د جرم ولسوالۍ په هندوشهر سیمه کې د یوه چک‌ډیم جوړولو چارې پیل شوې.

د بدخشان د کرنې، اوبو لګولو او مالدارۍ رییس قاري قطب‌الدین دهنوي پژواک خبري اژانس ته وویل چې د کرنې، اوبو لګولو او مالدارۍ وزارت د پراختیايي پلان پر بنسټ ټاکل شوې چې د ځمکې لاندې اوبو د پیاوړتیا، ځنګلونو جوړولو او د سېلابونو د تخریباتو مخنیوي لپاره سږ کال د دغه ولایت په ځینو ولسوالیو کې د اوبو چک‌ډیمونه جوړ شي.

هغه زیاته کړه: «موږ د هندوشهر سیمې د چک‌ډیم جوړولو کار پرانیستو شاهدان یو او د دې پروژې ذخیره چې د ۴۵ متره په اوږدوالي او نهه متره په لوړوالي سره د ۸۷،۷۵۰ متر مکعب اوبو د ځایولو ظرفیت لري، د بدخشان ولایت په جرم ولسوالۍ کې جوړېږي.»

هغه وویل، د دې پروژې ټولټال لګښټ دوه میلیونه او ۵۳۷ زره افغانۍ کېږي چې د کرنې وزارت له پراختیايي بودجې ورکول کېږي او چارې به یې د درېیو کاري میاشتو په موده کې بشپړې او ګټې اخیستنې ته به وسپارل شي.

د هغه په وینا، د دې پروژې په بشپړېدو سره به ۱۸۸۰ کورنۍ په مستقیم او غیرمستقیم ډول له اوبو برخمنې او د نږدې ۲۵۰ هکتاره للمي ځمکو د اوبو زېرمې به پیاوړې شي.

هغه وايي چې ګټې اخیستنې ته د یادې پروژې له وړاندې کېدو وروسته به د ساحې د سېلابونو رسوبي مواد مدیریت او د ځمکې لاندې اوبو زېرمې به پیاوړې شي.

د جرم ولسوال، مولوي محفوظ‌‌‌الله همدرد د یادې پروژې په پرانیست غوڼده کې د دغه ډول پرژو پلي کېدو د ستاینې ترڅنګ وویل، د کوکچه سیند دواړو اړخونو کې نږدې ۲۰ زره جریب شاړه او للمي ځمکه شته چې د اوبو کولو له لارې به یې خلکو ته د کار زمینه برابره شي، د کورنیو اقتصاد به وده وکړي او د بدخشان اوسېدونکي به د غله‌جاتو صادروونکو هېوادونو له اقتصادي وابستګۍ وژغورل شي.

هغه زیاته کړه، تېر حکومت د جرم ولسوالۍ کروندګرو ته هیڅ پاملرنه نه ده کړې، له همدې امله د هغوی ځمکې چې د کوکچې له سینده ۴۰ تر ۷۰ متره لوړې دي، شاړې او للمي پاتې دي.

محب‌الله محب د جرم ولسوالۍ د متنفذینو په استازولي د دغه ولایت د چک‌ډیمونو او زیرزمیني پروژو برخه کې د بدخشان د کرنې، اوبو لګولو او مالدارۍ ریاست هڅې ستايي او وايي، د ده‌سنګان، سنګلاخ او خرنداب کلي د یادو پروژو له ګټو برخمن شوي دي.

خو هغه زیاته کړه، د یادې پروژې پلي کېدل د جرم ولسوالۍ اوسېدونکو لپاره چې له ۸۰ سلنې ډېر یې کروندګر دي، بسنه نه کوي او حاصلات یې هم موسمي اورښت پورې اړه لري او هر کال د وچکالۍ او باران نشتون له امله کروندګر له کرنیزو ځمکو خپلې اړتیاوې نشي پوره کولای.

هغه له حکومته غواړي چې د یادې ولسوالۍ شاوخوا ځمکو اوبو کولو برخې ته چې ډېر لګښت هم نه پرې راځي، پاملرنه وکړي، للمي ځمکې په کرنیزو ځمکو بدلې کړي او د کروندګرو اندېښنې ختمې کړي.