ترینکوټ (پژواک، ۲۶ لېندۍ ۱۴۰۲): د اروزګان په دهراوود ولسوالۍ کې د علماوو یوې شورا په تېرو نهو میاشتو کې د خلکو تر سلو ډېرې بېلابېلې شخړې حل کړې دي.
د علماوو یاده شورا له څه باندې یو کال راهیسې د اروزګان په هراوود کې د «فقهي مجلس» په نوم فعالیت لري او د دغه ولایت د بېلابېلو سیمو ۵۰ دیني عالمان یې غړیتوب لري.
د یادې شورا یو غړی مولوي فضلمحمد وایي چې دغه شورا په رضاکار ډول فعالیت لري او د اروزګان له بېلابېلو سیمو خلک د خپلو مسئلو د حل لپاره دې شورا ته مراجعه کوي.
فضلمحمد وایي چې د یادې شورا غړي د شریعت او فقهې په رڼا کې د خلکو ستونزو ته رسېدنه کوي او شخړې یې ور هواروي.
هغه زیاتوي، یادې شورا په تېرو نهو میاشتو کې د خلکو ۱۱۰ بېلابېلې شخړې حل او فصل کړې چې په هغو کې حقوقي، د ځمکو د غصب، دښمنۍ او نورې بېلابېلې قضیې شاملې وې.
د یادې شورا یو بل غړی مولوي فقیرمحمد وایي، د دوی له خوا د فیصله شوو ۱۱۰ قضیو له ډلې د ۱۰۵ قضیو جانبینو قناعت کړی، خو د پاتې پنځه قضیې د ولسوالۍ محکمې ته راجع شوې دي.
هغه زیاته کړه: «خلک د یادې شورا له لوري پر ترسره شوو پرېکړو خوښ دي او دا د عام ولس د ستونزو د حل لپاره یوه اسانه لار ده.»
د اروزګان والي مولوي محمدعلي جان احمد وایي، دیني عالمان د منکراتو مخنیوي، د ټولني د ثبات، ستونزو ته د رسېدو او د خلکو یووالي برخو کې خورا ستر مسوولیت لري.
هغه زیاته کړه، په تېرو نهو میاشتو کې د دیني عالمانو له خوا د یادې شورا له لوري څه باندې سلو قضیو ته رسېدنه د خلکو لپاره یو ستر خدمت دی.
هغه دغه راز وویل، د شریعت او فقهې په چوکاټ د دهراوود ولسوالۍ د دیني عالمانو له خوا د حل شوو قضیو عملي کېدو برخه کې ولایتي اداره ژمنه ده او له نورو دیني عالمانو یې هم وغوښتل چې له حکومت او دولتي ادارو سره په دې برخه کې همکار و اوسي.
Visits: 135
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن