<p style="text-align: justify;">نیلي (پژواک، ۲ سلواغه ۱۴۰۲): د دایکنډي ځایي مسوولین وايي چې د دغه ولایت د پاتو ولسوالۍ په «سیاهبغل» سیمه کې د څلور اعشاریه دوه کیلومتر سړک جوړولو چارې د څه باندې ۱۵ میلیون افغانیو په لګښت پای ته ورسېدې او ګټې اخیستنې ته وسپارل شو.</p>
<p style="text-align: justify;">د دایکنډي د ټولګټو ریاست د ترانسپورټ مدیر احمدشاه احساني پژواک ته وویل، یاده پروژه د ۱۵ میلیون او سل زرو افغانیو په لګښت د ټولګټو ریاست له لوري پلې شوې او تېره ورځ د ځایي مسوولینو او خلکو په شتون کې ګټې اخیستنې ته وسپارل شوه.</p>
<p style="text-align: justify;">هغه زیاته کړه، یاد سړک چې ۴،۲۷ کیلومتر اوږدوالی لري په څلور میاشتو کې د پلچک او ویالو په درلودلو سره د دویمې درجې په بڼه جوړ شوی دی.</p>
<p style="text-align: justify;">د دایکنډي مرستیال والي مولوي احسانالله رحمتیار د یاد سړک د پرانیستې مراسمو پر مهال وویل چې دوی یاد ولایت کې د سړکونو جوړولو او بیارغولو ته ځانګړې پاملرنه کوي.</p>
<p style="text-align: justify;">هغه زیاته کړه، د دغه سړک د پاتې برخې جوړولو کار به په ۱۴۰۳ کال کې پیل شي او هیله یې څرګنده کړه چې د اروزګان ګېزاب ولسوالۍ سره د سیاهبغل سړک په نښلېدو سره به د دایکنډي خلکو یو شمېر ستونزې هوارې شي.</p>
<p style="text-align: justify;">ورته مهال، د پاتو ولسوالۍ یو شمېر اوسېدونکي د یاد سړک د جوړېدو هرکلی وکړ.</p>
<p style="text-align: justify;">د پاتو ولسوالۍ یوه اوسېدونکي حاجي معلم وویل چې له دې مخکې د یادې ولسوالۍ خلک د سړکونو خرابوالي له امله له ډېرو ستونزو سره مخ وو.</p>
<p style="text-align: justify;">هغه زیاته کړه: «پخوا د سړک نشتون له امله په تګ راتګ کې له لویې ستونزې سره مخ وو، سړک نه و، څو ځله مو ولایت ته وړاندیز وکړ بالاخره سړک مو جوړ شو.»</p>
<p style="text-align: justify;">دایکنډي یو له غرنیو ولایتونو دی چې د ډېری سیمو خلک یې د غیرمعیاري سړکونو او دغه راز د سړکونو له نشتون څخه شکایت لري.</p>
