<p style="text-align: justify;">کابل (پژواک، ۱۶ سلواغه ۱۴۰۲): د لوړو زدهکړو وزارت او چاپېریال ساتنې ملي ادارې مسوولین د اقلیمي بدلونونو له ستونزو سره د مبارزې لپاره د حللارو موندلو په موخه په ننګرهار پوهنتون کې د «اقلیمي بدلونونو نړۍوالې غونډې» له جوړېدو خبر ورکوي.</p>
<p style="text-align: justify;">هغوی نن (دوشنبه) په یوه ګډه خبري ناسته کې وویل، دغه غونډه به راتلونکې اونۍ د درېیو ورځو لپاره جوړه شي چې له هېواد او بهره به متخصصین او استادان په حضوري او انلاین بڼه په کې برخه واخلي.</p>
<p style="text-align: justify;">د لوړو زدهکړو وزارت علمي مرستیال لطفالله خيرخواه وويل، په دې ناسته کې به ١٤٠ علمي او څېړنيزې مقالې وړاندې او د دغو څېړنو پايلې به د اقليمي بدلون سره د مبارزې برخه کې د اړوندو ادارو په پالېسيو کې په پام کې ونیول شي.</p>
<p style="text-align: justify;">نوموړي د اقلیمي بدلونونو په تړاو نړۍوالو غونډو ته د افغانستان نه وربللو ته په اشارې وویل چې اقلیمي بدلون یوه بشري موضوع ده او باید له سیاست سره ونه تړل شي.</p>
<p style="text-align: justify;">خيرخواه له نړۍوالې ټولنې وغوښتل څو د اقليمي بدلون پر وړاندې د مبارزې برخه کې له افغانستان سره د پروژو په پلي کولو کې مرسته وکړي.</p>
<p style="text-align: justify;">دغه راز، د چاپېريال ساتنې ملي ادارې مالي مرستيال عبدالسلام حقاني په ننګرهار کې جوړېدونکې ناسته مهمه وبلله او ويې ويل، د دې غونډې له لارې به پر افغانستان د اقليمي بدلون د منفي اغېزو په اړه د څېړنيزو او علمي مقالو پايلې له نړۍوالو سره شريکې شي.</p>
<p style="text-align: justify;">هغه ټینګار وکړ چې د تېرو جګړو له امله افغانستان ته اقلیمي بدلونونو درانه زیانونه اړولي چې له همدې امله دا مهال ۲۱ میلیونه افغانان د څښاک پاکو اوبو له کمښت سره مخ دي.</p>
<p style="text-align: justify;">د چاپېریال ساتنې ملي ادارې د مسوولینو په وینا، افغانستان د اقلیمي بدلون له امله له رامنځته شوو ستونزو سره د مبارزې لپاره ۲۰ میلیارده ډالرو ته اړتیا لري.</p>
<p style="text-align: justify;">دا په داسې حال کې ده چې له دې مخکې ملګرو ملتونو اعلان کړی و چې افغانستان د اقلیمي بدلونونو له امله رامنځته کېدونکو ستونزو پر وړاندې د مبارزې لپاره تر ټولو د لږ چمتو هېوادونو له ډلې دی.</p>
<p style="text-align: justify;">د وروستیو څېړنو پر بنسټ، افغانستان د اقلیمي بدلونونو له امله په نړۍ کې شپږم ډېر ځپل شوی هېواد دی او د افغانستان کلیوالې سیمې په دې وروستیو کلونو کې د وچکالۍ، سېلابونو او ځمکښویېدنې له امله له بېشمېره چاپېریالي ستونزو سره مخ دي.</p>
