هلمند کې د ترافیکي پېښې له امله څلورو کسانو ته مرګ‌ژوبله اوښتې

<p style="text-align: justify;">لښکرګاه (پژواک، ۲ غویی ۱۴۰۳): د هلمند ځایي مسوولین وایي، د دغه ولایت مرکز لښکرګاه ښار کې د یوې ترافیکي پېښې له امله د یوې مېرمنې په ګډون څلورو کسانو ته مرګ‌ژوبله اوښتې ده.</p>

<p style="text-align: justify;">د هلمند د اطلاعاتو او فرهنګ ریاست مرستیال مولوي شېرمحمد وحدت پژواک خبري اژانس ته وویل، نن سهار د مرکز لښکرګاه ښار ایوب‌خان ښارګوټې ته څېرمه د یو مازدا او موټرسایکل ترمنځ ټکر شوی چې په پایله کې یوه مېرمن مړه شوې او د دوو ماشومانو په ګډون درې تنه ټپیان شوي دي.</p>

<p style="text-align: justify;">نوموړی وايي، مړه شوې مېرمن او دوه ماشومان د موتر سایکل سپرلي دي.</p>

<p style="text-align: justify;">وحدت زیاتوي، د مازدا موټر چلوونکی د امنیتي ځواکونو له لوري نیول شوی او تر پلټونو وروسته به عدلي ارګانونو ته ور وپېژندل شي.</p>