<p style="text-align: justify;">هرات (پژواک،۱۳ زمری ۱۴۰۳): د هرات په لرو پرتو سیمو کې مالداري د کوچیانو اساسي اقتصادي فعالیتونه یادېږي، خو په دغه ولایت کې یو شمېر کوچیان وایي، د حیواني درملو برخه کې له جدي ستونزو سره مخ دي او ملاتړ یې نه کېږي.</p>
<p style="text-align: justify;">هرات کې ځینو کوچیانو له پژواک خبري اژانس سره په خبرو کې د خپلې مالدارۍ کمېدو اصلي لاملونه د حیواني درملو کمښت او له مالدارانو د حکومت نه ملاتړ یادوي او وایي چې ډېرې کورنۍ د خپلو څارویو لپاره د اړتیا وړ خوراکي توکو او درملو نه برابرېدو له امله مجبوریږي چې خپل څاروي وپلوري او یا یې د تلف کېدو شاهدان وي.</p>
<p style="text-align: justify;">د هرات په کشککهنه ولسوالۍ کې د کوچیانو یوه قومي مشر خاکزرین خان وویل، مخکې یې د پسونو ۲۰ رمې درلودې چې هر یوه کې یې لسګونه پسونه و، خو اوس دا شمېر پسونه یې د امکاناتو لکه د درملو او خوراکي توکو نشتوالي له امله نیمایي ته رارسېدلي دي.</p>
<p style="text-align: justify;">نوموړي زیاته کړه، که دولت له دوی سره همکاري ونهکړي، ډېر کوچیان به ونه شي کړای په دې دښتو کې ژوند وکړي او خپلو مالداریو ته دوام ورکړي.</p>
<p style="text-align: justify;">د هغه په خبره، اوبي ځمکې نه لري که په راتلونکي کال کې بارانونه ونه شي، لومړني خلک چې زیانمنېږي کوچیان به وي، مجبوریږي به خپل څاروي وپلوري څو د خپلو کورنیو لګښتونه پوره کړي.</p>
<p style="text-align: justify;">د رباط سنګي ولسوالۍ یوه کوچي علي د خپلو څارویو د ناروغیو په اړه پژواک ته وویل، تر اوسه ورسره د درملو برخه کې یوازې یو ځل حکومت مرسته کړې ده چې دا اصلاً بسنه نه کوي.</p>
<p style="text-align: justify;">نوموړي زیاته کړه چې اوس یې هم څاروي ناروغ دي چې د درملنې وس یې نه لري.</p>
<p style="text-align: justify;">نوموړی وایي، د یوې میاشتې په ترڅ کې یې د ناروغۍ له امله له ۱۰ تر ۱۲ پسونه مړه شوي چې د هغه په خبره، په رباط سنکي او ګلران ولسوالیو کې ډېر کوچیان خپل پسونه کموي او که دا لړۍ همداسې دوام وکړي، بالاخره د کوچیانو مالداري به ختمه شي.</p>
<p style="text-align: justify;">هغه دغه راز وویل، دا ستونزې د دې لامل شوې چې ځينې کورنۍ له مجبوریته خپل څاروي وپلوري او یا د نه درملنې له امله تلف شي.</p>
<p style="text-align: justify;">حیواني ډاکټرانو هم په لرو پرتو سیمو کې د حیواني درملو نشتوالی یوه ستونزه یادوي او وايي چې د مالدارۍ د کمېدو یو لامل دی.</p>
<p style="text-align: justify;">په دغه ولایت کې یو حیواني ډاکټر، صابر عابدي پژواک ته د دغه مطلب ترڅنګ وویل، لوېدیځ زون د بېلابېلو حیواني ناروغیو شاهد دی چې ډېرې یې باکتریايي او ویروسي دي.</p>
<p style="text-align: justify;">عابدي زیاته کړه، په بازارونو کې شته حیواني درمل بېکیفیته دي او په عین وخت کې مالدارانو ته نه رسېږي.</p>
<p style="text-align: justify;">بلخوا، د دغه ولایت د سرحدونو، قومونو او قبایلو چارو ریاست مسوولین چې د کوچیانو امریت او د هغوی اړوند نورې چارې په کې مدغم شوې، وایي چې په ټوله کې د کوچیانو لس سلنه ستونزې حل شوې او لا هم له ډېرو ننګونو سره مخ دي.</p>
<p style="text-align: justify;">د هرات د سرحدونو، قومونو او قبایلو چارو رییس مولوي جمالالدین عمري وایي، د دوی ادارې په دغه ولایت کې د کوچیانو ستونزې سروې کړې، په دې اړه خبر دي او د دوی ستونزې یې له اړوندو ادارو سره شریکې کړې دي.</p>
<p style="text-align: justify;">نوموړي وویل، دمګړۍ دغه ریاست حمایوي امکانات په لاس کې نه لري، موسسې هم په دې برخه کې کمه همکاري لري.</p>
<p style="text-align: justify;">خو هغه زیاته کړه چې اداره یې هڅه کوي څو د کوچیانو ټولې ستونزې حل کړي چې دا چاره د بنسټونو له خوا هر اړخیزې همکارۍ ته اړتیا لري.</p>
