ښرنه (پژواک، ۲۴ وږی ۱۴۰۳): د پکتیکا ولایت د اتو ولسوالیو د مقامونو په ګډون څلور ریاستونه او یوه بله اداره خپلې ودانۍ نه لري.
د رسمي معلوماتو له مخې، د پکتیکا ولایت ګومل، نعمتاباد، چهاربران، اومنه، بکخیل، خوشامند، ګیان او شکین ولسوالۍ او د کډوالو او راستنېدونکو چارو، د کور او ښار جوړولو، د طبیعي پېښو پر وړاندې د مبارزې او د صنعت او سوداګرۍ ریاستونه او د المپیک امریت هغه دولتي اداري واحدونه دي چې خپلې ودانۍ نه لري او چارې په کرايي کورونو کې مخ ته بیايي.
بل لورته، د دغه ولایت اوسېدونکي شکایت کوي چې د دغو اداري واحدونو د خپلو ودانیو نشتون له امله د چارو د خلاصولو پرمهال دوی له ستونزو او سرګردانۍ سره مخ کېږي.
په دې اړه د ګیان ولسوالۍ یوه اوسېدونکي عبدالرحمن پژواک ته وویل چې د ګیان ولسوالۍ مقام خپله ودانۍ نه لري او په کرايي کور کې چارې پر مخ وړي.
د هغه په خبره، کله چې د یوه کس کار په دوه یا درېیو مدیریتونو پورې اړوند وي، نو اړ کېږي چې د ښار بېلابېلو ځایونو ته ولاړ شي او خپل کار خلاص کړي.
هغه وویل: «تر اوسه پورې ګیان ولسوالي تعمیر نه لري، مراجعین په ځای د دې چې د ولسوالي مقام ته ورشي او خپل کار خلاص کړي اړ کېږي چې د ولسوالۍ مقام اړوند مدیریتونو چې د ښار په بېلابېلو ځایونو کې دي، هلته ورشي چې ډېره فاصله هم لري، خپل کار خلاص کړي چې دا یوه لویه سرګرداني ده.»
دغه راز، د ګومل ولسوالۍ یوه اوسېدونکي حضرت محمد هم پژواک ته وویل چې د دوی د ولسوالۍ مقام هم خپله ودانۍ نه لري.
هغه زیاته کړه: «په ولسوالۍ کې مو هیڅ شی نشته، کلینیک نشته دی، نور کارونه نه دي شوي، ولسوالۍ خپل تعمیر نه لري، کله چې کوم کار خلاصوو باید څو ځایونو ته ورشو، دا لوی مشکل دی چې باید حل شي.»
همدارنګه د مرکز ښرنې یوه اوسېدونکي محمدرسول پژواک ته وویل چې په ښرنه کې هم ځیني ریاستونه خپلې ودانۍ نه لري.
ده زیاته کړه: «کله چې یو ریاست خپله ودانۍ ونه لري او هر کال ځای هم بدل کړي خلکو ته بیا د ریاست په پیدا کولو کې لوی مشکل پيدا کېږي او هم کرايي کورونه د مراجعینو لپاره دومره مناسب ځای نه وي.»
د دغه ولایت یو شمېر نورو اوسېدونکو هم ورته څرګندونې وکړې او له حکومتي مسوولینو یې د یادې ستونزې د حل غوښتنه وکړه.
بلخوا حکومتي مسوولین هم تاييدوي چې په دغه ولایت کې ځینې ادارې خپلې ودانۍ نه لري.
د پکتیکا مرستیال والي مخدوم عبدالسلام سعادت پژواک ته وویل چې تېر کال د کورنیو چارو وزارت له خوا څلورو ولسوالیو ته د ودانیو جوړول منظور شوي چې د دوو د جوړولو چارې روانې دي.
نوموړي وویل: «پکتیکا کې ځینې ولسوالۍ نوې ایجاد شوي او ځینو یې له پخوا ودانۍ نه درلودې تېر کال د څلورو ولسوالیو ودانۍ منظورې شوې دي، د نکې او دیله ولسوالیو ودانۍ چارې هم پیل شوې دي او د پاتې ودانیو د جوړېدو لپاره مو هم هڅې پیل کړې دي.»
ده زیاته کړه چې خلکو ته د ښو خدمتونو وړاندې کولو په موخه دولتي ریاستونو او ولسوالیو ته د ودانیو جوړول مهم دي.
د پژواک خبري اژانس د یو بل راپور له مخې، فراه ولایت د ۱۱ ولسوالیو په ګډون ۵۸ ملکي او نظامي اداري واحدونه لري چې له ډلې یې لس ریاستونه خپلې ودانۍ نه لري.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن