<p style="text-align: justify;">کابل (پژواک، ۱۶ لړم ۱۴۰۳): له پېښو سره د مبارزې اداره وايي، د کابل پغمان کې د تېرې شنبې ورځې اورلګېدنه کې درې تنه مړه او ۳۳ ټپیان شوي او ۱۲ شرکتونه، ۶۴ کورونه، ۵۵ هټۍ او ۱۲ وسایط زیانمن شوي دي.</p>
<p style="text-align: justify;">له پېښو سره د مبارزې امادهګۍ ملي ادارې په خبرپاڼه کې راغلي، د سروې او ارزونې ګډو ټيمونو د راپور پر بنسټ، د کابل پغمان ولسوالۍ په قلعهٔ حیدر سیمه کې د ګاز یو شرکت د وروستۍ اورلګېدنې له امله درې تنه مړه او ۳۳ ټپیان شوي دي.</p>
<p style="text-align: justify;">سرچينه لیکي، دغه راز په دې اورلګېدنه کې ۱۲ شرکتونه، ۶۴ کورونه، ۵۵ هټۍ او ۱۲ وسایط زیانمن شوي دي.</p>
<p style="text-align: justify;">په خبرپاڼه کې راغلي، د یادې ادارې مشرتابه د پېښې له قربانیانو سره غمرازې ترڅنګ ویلي چې د زیانمنو شوو کسانو لپاره د مرستو رسولو هڅې روانې دي.</p>
<p style="text-align: justify;">دغه راز، سرچینې زیاته کړه چې په دې اړه یو غونډه کې په سوداګریزو مرکزونو او د تېلو او کازو پمپ سټېشنونو کې د دغه ډول پېښو د مخنيوي لپاره د سخت تدابیر نیول کېدو په اړه خبرې شوې دي او پرېکړه شوې چې د داسې پېښو د مخنيوي لپاره ژر تر ژر اقدامات وشي.</p>
