<p style="text-align: justify;">ګردیز (پژواک، ۷ کب ۱۴۰۳): د پکتيا د پوهنې رياست مسوولين وايي چې له ياد رياست سره د یوې همکارې موسسې لخوا د شاوخوا ۲۵ ميليونه افغانيو په ارزښت د درسې توکو مرسته وشوه.</p>
<p style="text-align: justify;">د پکتيا د پوهنې رييس مولوي عبدالقيوم فاروقي نن په دې اړه جوړه شوې غونډه کې وویل چې د يوې همکاري مؤسسې لخوا د زدهکوونکو د ۲۸۰۳ درسي کېټونو مرسته وشوه چې په هر کېټ کې لس قلمه درسي توکي شامل دي شاوخوا ۵۶ زره زده کوونکو ته به ووېشل شي.</p>
<p style="text-align: justify;">د هغه په خبره، په دغه مرستې سره به په ښوونځيو کې تر درېيم ټولګي پورې د زدهکوونکو د قرطاسيې ستونزه حل شي.</p>
<p style="text-align: justify;">دی وایي چې دغه توکي به له لومړۍ تر درېیم ټولګي زده کوونکو ته ورکړل شي.</p>
<p style="text-align: justify;">فاروقي همداشان وويل چې د ۲ زره ښوونکو لپاره د ۱۶۰۱ تدريسي کېټونو او د ۳۱۴ ښوونځيو لپاره د اداري کېټونو مرسته هم شوې چې د ښوونځيو د ادارو د اړتيا وړ ټول توکي پکې شامل دي.</p>
<p style="text-align: justify;">د پکتيا پوهنې رياست د معلوماتو له مخې، دا مهال پکتيا کې ټول ۳۷۱ دولتي ښوونځي شتون لري چې دوه لکه او اته اتيا زره زده کوونکي پکې زده کړې کوي.</p>
<p style="text-align: justify;"></p>
