احمد صهیب حسرت

د اطلاعاتو او فرهنګ وزارت د خپرونو مرستیال د وزارتونو او خپلواکو ادارو ویاندویانو ته د یوه روزنیر سمینار پر مهال رسنۍ د نظام مهمه برخه بللې او ویلي یې دي چې ویاندویان باید له رسنیو او خبریالانو سره نږدې او صمیمي اړيکي ولري.

د حماس له لوري د ازادېدونکو یرغملو د نوملړ له اعلان وروسته د اسرائیلو لومړي وزیر ویلي چې په ځايي وخت ۱۱:۱۵ به غزه کې اوربند پلی شي.

د بهرنیو چارو سرپرست وزیر د سره صلیب او سرې میاشتې ټولنې نړیوال فدارسیون د اسیا حوزې مشر سره په لېدنه کې، د روغتیایي برخې پر تمویل او تجهیز خبرې کړي او ترې غوښتي یې دي چې په افغانستان کې د سوري زړه د ناروغوماشومانو درملنې ته دې ځانګړی پام وشي.

د ریاست‌الوزراء اقتصادي مرستیال په خوست کې د یوې مدرسې د دستاربندۍ په مراسمو کې له فارغ شوو کسانو غوښتي چې معاصرې زده‌کړې هم وکړي څو خلکو ته دیني شعور او فهم په معاصره ژبه ولېږدولای شي.

ایرنا راپور ورکړی چې تهران کې په یوه وسله‌وال برید کې دوو قاضیانو ژوند له لاسه ورکړی، یو بل ټپي شوی او بریدګر هم له برید وروسته ځان‌وژنه کړې ده.

د افغانستان بانک سبا (یکشنبه) د داوطلبۍ له لارې ۱۸ میلیونه امریکايي ډالر لیلاموي.

غزه کې د حماس او اسراييلو تر منځ د اوربند له هوکړې د ملګرو ملتونو تر څنګ، سعودي عربستان اوترکیې هم هرکلی کړی، خو راپورونه ښيي چې د اسراييلو کابینې تر اوسه د دغه اوربند تړون نه دی تصویب کړی.

د راپورونو له مخې، د حماس او اسرائیلو له مرکچیانو سره د قطر د لومړي وزیر له جلا جلا لیدنو وروسته غزه کې د اوربند او د یرغملو د خلاصون هوکړه وشوه.

په اسلام‌اباد کې افغان سفیر په پاکستان کې د کډوالو لپاره د ملګرو ملتونو عالي کمېشنرۍ مشرې سره په لیدنه کې د افغان کډوالو د نیول کېدو او ځورنې په اړه اندېښنه ښودلې او ترې غوښتي یې دي چې اسنادلرونکو افغان کډوالو د حقونو دفاع برخه کې باید اقدامات وکړي.

د ملګرو ملتونو د بشري مرستو د همغږۍ‌ دفتر وايي چې په روان میلادي کال کې په افغانستان کې لږ تر لږه ۱۴.۳ میلیون کسان روغتیایي پاملرنې ته اړتیا لري او دوی به وکولی شي یوازې ۹.۳ میلیون کسانو ته روغتیایي مرستې برابرې کړای شي.

د تېر لمریز کال له پیل راهیسې افغانستان کې د وچکالۍ، زلزلو، سېلابونو او نورو طبیعي پېښو له امله څه باندې ۲۴ زره کورنۍ بې‌ځایه شوې دي چې تر نیمایي ډېرې یې په هرات او هلمند کې دي.  

د بهرنیو چارو وزارت وایي، د دغه وزارت سرپرست په کابل کې د سعودي عربستان له سفیر سره د دوه اړخیزو اړیکو پر پراختیا او سعودي میشتو افغانانو د کونسلي خدمتونو پر رسولو خبرې وکړې.