متقي: د سعودي حکومت دې د افغانانو لپاره د حج او عمرې په ونډه کې زیاتوالی راولي

کابل (پژواک، ۲۳ مرغومې ۱۴۰۳): د بهرنیو چارو وزارت وایي، د دغه وزارت سرپرست په کابل کې د سعودي عربستان له سفیر سره د دوه اړخیزو اړیکو پر پراختیا او سعودي میشتو افغانانو د کونسلي خدمتونو پر رسولو خبرې وکړې.

د بهرنیو چارو وزارت په خبرپاڼه کې راغلي چې د دغه وزارت سرپرست مولوي امیرخان متقي په کابل کې د سعودي عربستان شاهي دولت سفیر فیصل طلق البقمي سره ولیدل.

خبرپاڼه کې راغلي، په دې ناسته کې د افغانستان او سعودي د دوو اړخیزو اړیکو پر پراختیا، سعودي ‌مېشتو افغانانو ته د کونسلي خدماتو رسول او په ټوله کې دوو اړخیزو اړیکو کې له شته فرصتونو څخه پر استفادې خبرې وشوې.

متقي په دغه لېدنه کې غوښتنه کړې سعودي حکومت د افغانانو لپاره د حج او عمرې په کوټه کې زیاتوالی راولي او همدا راز سعودي کې مېشتو افغانانو ته د کونسلي خدماتو په رسولو کې هم مرسته وکړي.

بهرنیو چارو وزارت لیکلي، د سعودي سفیر په خپل وار د افغانستان او سعودي دوې اړخیزې اړیکې تاریخي وبللې او ټینګار یې وکړ چې هېواد یې غواړي په کابل کې د خپل حضور له لارې په مختلفو برخو کې افغانانو سره مرسته وکړي.

هغه ویلي، دواړه هېوادونه کولای شي په بېلابېلو برخو کې کار وکړي او په کابل کې د دوی د سفارت د فعالیت د بیا پیل موخه دا ده چې له ټولو شته ظرفیتونو څخه ګټه پورته شي.