<p style="text-align: justify;">کابل (پژواک، ۳۰ مرغومې ۱۴۰۳): د اطلاعاتو او فرهنګ وزارت د خپرونو مرستیال د وزارتونو او خپلواکو ادارو ویاندویانو ته د یوه روزنیر سمینار پر مهال رسنۍ د نظام مهمه برخه بللې او ویلي یې دي چې ویاندویان باید له رسنیو او خبریالانو سره نږدې او صمیمي اړيکي ولري.</p>
<p style="text-align: justify;">د اطلاعاتو او فرهنګ وزارت په خبرپاڼه کې راغلي چې نن په کابل کې د وزارتونو او مستقلو ادارو ویاندویانو ته څلور ورځنی روزنيز سمينار پيل شو.</p>
<p style="text-align: justify;">د اطلاعاتو او فرهنګ وزارت اطلاعاتو ته د لاسرسي رئيس مولوي رحمتاللّٰه نړۍوال په دې تړاو جوړه شوې غونډه کې ویلي، د رياستالوزرا عالي مقام له حکم سره سم په هرو درېيو مياشتو کې له ویاندویانو سره د همغږۍ غونډه جوړېږي، دا ښوونيز سمينار به څلور ورځې دوام وکړي.</p>
<p style="text-align: justify;">د اطلاعاتو او فرهنګ وزارت د خپرونو چارو مرستیال مولوي مهاجر فراهي هم ویلي: «مطبوعاتي برخه په نظام کې ډېره مهمه برخه ده، د نظام کاري ژمنتيا، تعهد، فعاليتونه او لاسته راوړنې د ویاندویانو په واسطه تر ولسونو رسېږي.»</p>
<p style="text-align: justify;">ده ویلي: «اسلامي امارت د ډېرو محدوديتونو سره هم په تېرو شاوخوا درېيو کلونو کې سترې لاسته راوړنې لري، چې تر خلکو رسول يې زمونږ او ستاسې مسووليت دی.»</p>
<p style="text-align: justify;">فراهي ویلي، د هرې ادارې وياند بايد د خپلې اړوندې ادارې او فعالیتونو په اړه بشپړ معلومات ولري، هر وياند بايد د خپلې اړوند ادارې معلومات رسنيز کړي، دقت او سرعت بايد په نظر کې ونيسي او له رسنيو او خبريالانو سره صمیمانه اړيکې ولري.</p>
