د افغانستان بانک سبا ۱۸ میلیونه امریکایي ډالر لیلاموي

کابل (پژواک، ۲۹ مرغومی ۱۴۰۳): د افغانستان بانک سبا (یکشنبه) د داوطلبۍ له لارې ۱۸ میلیونه امریکايي ډالر لیلاموي.

یاد بانک نن پر خپله اېکس‌پاڼه له سوداګریزو بانکونو، د صرافۍ او پولي خدمتونو له شرکتونو چې په شرایطو برابر وي، غوښتنه کړې څو په دې داوطلبۍ کې ګډون وکړي.

سرچینې زیاته کړې، د داوطلبۍ ګټونکي اړ دي څو خپل حسابونه د لیلام ورځې تر پایه تصفیه کړي.

د سرچینې د معلوماتو له مخې، د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کېږي، د داوطلبۍ ګټونکي اړ دي چې د خپل ذمت د قیمت پیسې په یو ځل، په نغدي ډول او په ټاکلې موده کې د افغانستان بانک ته وسپاري.

تېره اونۍ هم د افغانستان بانک ۱۶ میلیون ډالره لیلام کړي وو.