نورالله ځاځی

د افغانستان د بهرنیو چارو وزارت سوریه کې د اسرائیلي ځواکونو بمبارۍ غندلي او دغه کار یې د سوریې د خپلواکۍ څرګند نقض بللی دی.

د ټولګټو وزارت وايي چې د خلکو د ځان او مال ساتنې په موخه د سالنګونو لویه لار د ټولو لویو مسافروړونکو وسایطو لپاره د روان لمریز کال د مرغومي میاشتې تر څلورمې وتړل شوه.

په اسلام‌اباد کې افغان سفیر د پاکستان د لومړي وزیر مرستیال او د بهرنیو چارو له وزیر سره په لېدنه کې پر دوه اړخیزو اړیکو، سوداګریزو مسایلو او سیمه‌اییز اتصال خبرې کړي دي.

د افغانستان د مالیې وزارت وايي چې د بلخ، اقینې او کندوز ولایتونو په ګمرکونو کې د ۱۵ میلیون افغانیو په لګښت د لوړ تناژ تلې جوړې شوې.

د مالیې وزارت وايي، د نیمروز او سپین‌بولدک ګمرکونو کې د ۱۹،۲ میلیون افغانیو په لګښت د ارشیفونو جوړولو چارې پیل شوې.

د ریاست‌الوزراء اقتصادي معاونیت وايي، د اقتصادي کمېسیون په نوبتي غونډه کې د افغان – ټرانس پروژې په اړه د ټولګټو وزارت د اوسپنې پټلۍ معینیت راپور تایید او اړوندو وزارتونو او ادارو ته یې په اړه لارښوونې وشوې.

د ټولګټو چارو وزارت وايي چې د سالنګونو لویه لار نن سهار لس بجې له شمال څخه سوېل ته د کوچنیو مسافر وړونکو وسایطو پر مخ پرانیستل شوه.

د کلیو د بیارغونې او پراختیا وزارت وایي، کندوز کې د څه باندې ۹۰ زره امریکایي ډالرو په لګښت د اوبو رسولو یوې شبکې چارې بشپړې او په نورستان کې بیا د یوه سړک جوړولو چارې پیل شوې.

کابل ښاروالي وايي، د کابل ښار په اوولسمه ناحیه کې د ۴۴ میلیون افغانیو په لګښت د فرعي سړکونو جوړولو شپږو پروژو چارې بشپړې شوې.

د ریاست‌الوزراء اقتصادي معاونیت د افغانستان د اقتصادي وضعیت په اړه د نړۍوال بانک موندنې له عیني واقعیتونو لرې بللې او ويلي یې دي، غوره ده چې نړۍواله ټولنه د حقایقو په واقعي درک سره له افغان حکومت سره مثبت تعامل ته مخه کړي.

د افغانستان برېښنا شرکت وايي چې له ترکمنستان سره یې د وارداتي برېښنا تړون د ۲۰۲۵ زېږدیز کال لپاره تمدید کړ.

په پاکستان کې د قرغزستان سفیر او اسلام‌اباد کې د اسلامي امارت د سفارت سرپرست د افغانستان او منځنۍ اسیا هېوادونو په ځانګړې توګه، د قرغزستان ترمنځ د دوه اړخیزو او تاریخي اړیکو، مشترکاتو، فرصتونو او ننګونو په اړه خبرې کړې دي.