یوسف ظریفي

د ننګرهار ولایت مرکز جلال‌اباد ښار په شپږمه ناحیه کې د ۱۶نیم میلیونه افغانیو په لګښت د یوه فرعي سړک او ویالو جوړولو چارې پیل شوې.

په ننګرهار ولایت کې له څه باندې ۴۰۰ کروندګرو سره د غنمو د اصلاح شوي تخم او په غزني کې له دوه زره یتیمانو او بې‌وزولو زده‌کوونکو سره د ژمنيو توکو مرسته وشوه.

د ننګرهار په روداتو ولسوالۍ کې د دوو کورنيو ترمنځ ۱۴ کلنه دښمني د حکومتي مسوولینو او قومي مشرانو په منځګړتوب حل او فصل شوه.

د ننګرهار امنیه قومانداني وايي، د دغه ولایت خوږياڼو ولسوالۍ کې نامعلومو کسانو یو تعویذګر وژلی دی.

د ننګرهار امنیه قومانداني وايي، د دغه ولایت په مرکز جلال‌اباد ښار کې یو کس وژل شوی چې په تړاو یې د هغه مېرمن او یو بل کس نیول شوي دي.

د ننګرهار ولایت په کوټ ولسوالۍ کې د ناچاوده توکو د چاودنې له امله درې ماشومان ټپيان شوي دي.

د ننګرهار د عامې روغتيا رياست وايي چې د ملګرو ملتونو د ماشوم ساتنې نړۍوال صندق د دغه ولایت حوزوي روغتون د مور او ماشوم درملنې له څانګې سره د ۷۰ زره ډالرو په ارزښت د روغتيايي تجهیزاتو او وسايلو مرسته وکړه.

د ننګرهار په مرکز جلال‌اباد ښار کې د پهلوانۍ فدراسيون له لوري د ۴۰۰ لوبغاړو ترمنځ د پهلوانۍ سيالۍ پيل شوې.

د ننګرهار کډوالو چارو رياست وايي، که څه هم اوس‌مهال له پاکستانه د کډوالو راتګ کم شوی خو په عمري لنډمهالي پنډغالي کې د راستنېدونکو کډوالو لپاره ټول امکانات برابر شوي دي.

د ننګرهار د پوهنې رياست وايي، د افغان ترک لېسو ادارې له لوري د دغه ولایت د مرکز جلال‌اباد ښار د افغان ترک لېسې ابتداییه څانګه هم پرانیستل شوه.

د ننګرهار ولايتي ادارې او سوداګرۍ وزارت په دغه ولایت کې د سوداګرو د ستونزو د حل لپاره په ګډه ځانګړې کمېټه جوړه کړه.

د ننګرهار امنیه قومانداني وايي چې په جلال‌اباد ښار او ولسوالیو کې ۳۷۰ کیلوګرامه نشه‌یي توکي کشف او ترلاسه شوي او په تړاو یې شپږ کسان هم نیول شوي دي.