جلالاباد (پژواک، ۸ غبرګولی ۱۴۰۴): د ننګرهار د مرکز جلالاباد ښار د نوي حلقوي سړک د جوړېدو عملي چارې پیل شوې چې درې میلیارده افغانۍ لګښت ورباندې کېږي.
د ننګرهار ولایت د مرکز جلالاباد ښاروال قاري بسمالله بلال د دغه سړک د کارونو د پیل په مراسمو کې وويل، دا سړک درېیو فازونو او څو پړاونو کې جوړېږي چې نن یې د لومړي فاز د سړک هوارولو او د سړک له مسیر څخه د کورونو او سوداګریزو ځایونو د لرې کولو عملي چارې پیل شوې.
هغه وويل: «اول فاز ۸ اعشاریه ۳ کیلومتره اوږدوالی لري، له سرخاب پل څخه تر بهسودو پل پورې دی. د څلوېښت متره په پراخوالي د دغه سړک چارې ترسره کېږي چې وروسته به د دويم او درېيم فاز چارې هم په خپل وخت ترسره شي.»
هغه زیاته کړه، دا سړک به ښي او چپ لور ته څلور – څلور ترافيکي لينونه، دوه لوی پلونه، ويالې او نورې اسانتیاوې ولري.
د نوموړي په وينا، دا سړک د ښاروالۍ د عوايدو، تخنيکي ټيم، کارګرو او ماشينرۍ پرمټ د اتو مياشتو په موده کې جوړيږي.
نوموړي د دغه سړک په مسير کې د ټولو قانوني ملکيتونو د استملاک په اړه ډاډ ورکړ.
د جلالاباد ښاروال وويل، په دغه ۲۱ کيلومتره سړک درې ميليارده افغانۍ لګښت راځي چې اوس یې دوی د خپل ټيم پرمټ د سړک مسير جوړوي او وروسته به د ملي بودجې او همکارو موسسو په مرسته د سړک ټولې چارې بشپړې شي.
ورته مهال، د جلالاباد ښار اوسېدونکي د دغه سړک په جوړېدو خوښ دي او غوښتنه کوي چې باید په معیاري ډول ورغول شي.
د يادونې ده چې د دغه جوړېدونکي ۲۱ کيلومټره حلقوي سړک د مسیر له معلومولو وروسته به د ښاروالي له داخلي عوايدو او د نورو اداراتو په همکاري د دغه سړک د قیر او اساسي جوړېدو چارې هم ترسره شي.
GET IN TOUCH
NEWSLETTER
SUGGEST A STORY
PAJHWOK MOBILE APP