منځپانګې ته تلل
شنبه ۲۱ نومبر ۲۰۲۶ · کابل ۱۱:۱۸ غ.م
۱۲°ورېځ · ↑۱۴° ↓۳°د هوا کیفیت: منځنی

د ارغنداب له کروندګرو سره دکرنيزو توکيو د مرستې لړۍ پيل شوه

· ۲ دقیقې لوستل · ۷۶ کتنې

کندهار ښار ( پژواک ٨ مرغومى ٩٠ ) : د کروندګرو کرنيزو محصولاتو د ډېر والي په موخه د کندهار ولايت د ارغنداب ولسوالۍ له کروندګرو سره د اصلاح شويو تخمونو او کيمياوي سرې د وېش لړۍ پيل شوه.

 پر کروندګرو د کرنيزو توکيو د وېش دا لړۍ نن د دې ولسوالۍ په دوراهي سيمه کې د ده لاهور او سيدانو د کليو پر اوسېدونکو پيل او وروسته به نورو سيمو ته هم وغځېږي.

 د ارغنداب ولسوال حاجي شاه محمد احمدي پژواک خبري اژانس ته وويل، چې د IRD په نوم مرستندويه ادارې د کوکنارو او بنګو د کښتونو د مخنيوي په موخه پرېکړه کړې، چې د نورو بشري مرستو تر څنګ له هغوى سره د کرنيزو توکيو مرسته هم وکړي.

 هغه زياته کړه، د ولسوالۍ د مقام او د کرنې رياست د ترويج مديريت په همکارۍ يې د کروندګرو لېست ترتيب کړى، چې د تذکرې په لرلو سره به له هر کروندګر سره د ٤٨٠٠ افغانيو په بدل کې د کرنې د يوه کېټ مرسته کېږي.

 د نوموړي په وينا، په يوه کيټ کې د بادرنګو، موليو، بانجانو، روميانو، پيازو، سبزيو، ګازرو، بېنډيو، مرچو، هندواڼو، خټکيو، ماشو، جوارو او شپتلو   اصلاح شوي تخمونه ٦ پارسله توره او ٤ پارسله سپينه کيمياوي سره شامله ده.

 ولسوال وايي، چې د دې مرستې له لارې به د کروندګرو کرنيز محصولات ډېر او اقتصاد ته به يې د پام وړ ګټه ورسېږي.

 د ده لاهور د سيمې يوه کروندګر نور محمد، چې دا مرسته يې تر لاسه کړې وه، خوښ ښکارېده، خو د لا ډېرو مرستو غوښتنه يې کوله.

 هغه وويل، چې  دلته ټول خلک وچکاليو او جګړو ځپلي دي، په کار ده له خلکو سره د اوږد مهال لپاره کرنيزې مرستې وشي، تر څو خلک بېرته د پخوا په څېر په پښو ودرېږي او شته ستونزې يې هوارې شي.