اسعد اباد ( پژواک ١١ مرغومى ٩٢ ) : د کونړ په نورګل ولسوالۍ کې د علني محکمې په ترڅ کې يو تن د خپلې ښځې د وژنې په تور په شل کاله بند محکوم شو .
دغه علني محکمه د مرغومي په ١١مه، په نورګل ولسوالۍ کې جوړه شوې وه، چې پکې ددواړو لوريو د کورنيو غړيو او عامو خلکو برخه اخيستې وه.
لومړی موظف څارنوال احمد ضياء ضياء صورت دعوه ولوستله ، چې په کومه کې په تورن تن مير محمد د خپلې ښځې ظلمه او د محصل خان دقتل ټول اسناد او شواهد موجود وو.
هغه له قضايي پلاوي وغوښتل ،چې بايد ميرمحمد ته دجزا د قانون د ۳۹۶ مادې او د ښځو پر وړاندې د تاو تريخوالي د منع قانون د۲۲مې مادې په اساس سخته سزا ورکړای شي .
له اوسپنو په جوړه شوې پنجره کي ولاړ شاوخوا پنځوس کلن مير محمد، چې لاسونه يې تړل شوي وو، محکمې ته وويل ، چې خپله ښځه او د محصل په نامه تن يې ځکه ووژل ، چې دوى سره نامشروع اړيکې لرلې.
هغه زياته کړه : ((محصل خان زما زوم و،لور مې ورکړې وه له ناموس څخه پرته بله مسئله نشته .))
مير محمد وويل ، چې په خپلو سترګو يې ښځه ليدلې چې له زوم (محصل خان )سره يې نامشروع اړيکې لرلې او له قضايي پلاوي يې وغوښتل ،چې خوشې يې کړي.
د قضايي پلاوي مشراو دنورګل ولسوالۍ دلومړنۍ محکمې رييس قاضي صابر سهاک د موظف څارنوال د اسنادو او شواهدو په کتو او د تورن ميرمحمد د اقرار اورېدو وروسته خپله پرېکړه اعلان کړه.
په دې پرېکړه کې راغلي ، چې مير محمد د لعل محمدزوى د جزا قانون د۳۹۶ مې مادې او دښځو پر وړاندې د تاوتريخوالي د منع قانون د۲۲ مادې دحکم پر اساس د خپلې مېرمنې بي بي ظلمه او د محصل خان دقتل په تور په شل کاله تنفيذي بند محکوم شوى.
قاضي وويل ، چې دا پرېکړه يې نهايي نه ده او دوى کولى شي چې استيناف طلبي وکړي.
دتورن مدافع وکيل محب الله فاروقي قضايي پلاوي ته وويل ، چې موکل يې له ډېرې مجبورۍ قتل کړی او خپله دمقتول زامنو په دوسيه کې اقرار کړی ، چي پلار يې (ميرمحمد) کوم کار ترسره کړی دوى معاف کړی او هېڅ ډول کار ورسره نه لري .
مدافع وکيل له قضايي پلاوي وغوښتل، چې بايد ميرمحمد بري الزمه اعلان شي .
