کابل (پژواک، ۱۵ وږى ۹۴) : د افغانستان د تېر جهاد د سرښندنو د ستايلو په موخه په کابل کې د قربانيانو د انځورونو نندارتون پرانيستل شو.
دغه نندارتون چې د وږي په ١٥مه، د کابل په ملي ګالرۍ کې د اجراييه رياست او يو شمېر سياسي او ټولنيزو بنسټونو له خوا پرانيستل شو، په ۱۸ غرفو کې د سلګونه قربانيانو انځورونه نندارې ته وړاندې شوي او تر يوې اوونۍ پورې به پرانيستى وي .
په ځينو غرفو کې د څرخي پوليګونو ته ورته ځايونه جوړ شوي چې په کې ګڼ شمېر په وينو لړلي جسدونه او د قربانيانو د انځورونو تر څنګ په شنو ټوکرو پوښل شوي قبرونه هم جوړ شوي.
د دې نندارتون په پرانيسته کې د اطلاعاتو او فرهنګ او کار، ټولنيزو چارو، شهيدانو او معلولينو د وزارتونو د چارواکو تر څنګ يو شمېر جهادي ګوندونو او د ټولنيزو ټولنو استازو هم ګډون درلود.
د شهيدانو او معلولينو په چاروکې د اجراييه رياست سلاکار سلطانعلي مرتضی نېکزاد ددې نندارتون د پرانستې پر مهال خبريالانو ته وويل چې ددې نندارتون د پرانيستلو موخه د "شهيدانو" يادونه اود هغوی د مېړانې ستايل دي.
هغه وايي: "د شهيدانو د خاطرو ياد او د هغوی د مېړانو ستايل په اصل کې د خپلواکۍ ساتل او ستايل دي."
د کار، ټولنيزو چارو، شهيدانو او معلولينو د وزارت مرستيال واصل نور مهمندددې نندارتون پرانيستل د قربانيانو د مېړانې او سرښندنو د ياد او ستايلو ښه لار وبلله او زياته يې کړه چې دغو "شهيدانو" د هېواد خپلواکۍ او ملي نواميسو د ساتنې لپاره قرباني ورکړې او تل بايد ددې کسانو ياد ژوندی وساتل شي.
هغه زياته کړه: "د همدې "شهيدانو" د مېړانې او سرښندنو برکت دی چې نن په افغانستان کې د ملي وحدت حکومت رامنځته شوی ،نو اړېنه ده چې دغه حکومت د" شهيدانو" او معلولينو له کورنيو سره هر اړخېزې مرستې وکړي."
د اطلاعاتو او فرهنګ وزارت د نشراتي چارو مرستيالې سيدې مژګان مصطفوي بيا د هېواد په ټولو رسنيو غږ وکړ چې د "شهيدانو" د اوونۍ په اوږدو کې خپل نشرات ددې ورځې له روحيې سره سم نشر ته چمتو کړي.
خو د "شهيدانو" د کورنيو يو شمېر غړي بيا د کار، ټولنيزو چارو، شهيدانو او معلولينو وزارت او د جهادي ګوندونو له کړنو ناخوښه برېښيدل او ويل يې چې ډېر داسې د" شهيدانو" کورنۍ شته چې د کورنۍ هېڅ سرپرست نه لري او اړونده ارګانونو هېڅ توجه نه ده ورته کړې.
حمېرا امين چې په خپله يې هم د څرخي پله په زندان کې دوه کاله او شپږ مياشتې تېرې کړي او د جهاد په دوران کې يې درې وروڼه ( محمدضياء امين، محمدشفېع امين او محمدخالد امين) د کمونستي نظام د چارواکو له خوا وژل شوي ، پژواک خبري اژانس ته وويل:"اصلا خبرو او مرکې ته اړتيا نشته، کومه دي هغه بينا سترګې چې د قربانيانو له کورنيو سره مرسته او لاسنيوی وکړي."
هغې د خپلو درېيو وژل شويو وروڼو انځورونه مخې ته د چغو او سلګيو پر مهال پر حکومتي چارواکو غږ وکړ چې لږ تر لږه دې د قربانيانو د کورنيو ستونزو ته پام او رسېدنه وکړي.
ټاکل شوې چې د وږي د مياشتى له ١٨ تر٢٤ نيټې د شهيدانو اوونۍ ونمانځل شي .
د کار، ټولنيزو چارو ، شهيدانو او معلولينو وزارت د معلوماتو له مخې، دا مهال په افغانستان کې د دوه ميليونو په شاوخوا کې د شهيدانو او معلولنيو د کورنيو وارثين شته چې له دغه وزارت سره تر اوسه يواځې ۲۵۰ زره کورنۍ ثبت شوې دي.
غړيYou need to subscribe to view the full article. Please login or register a new account.
