يوناما: د شمال د ښځو په ژوند کې مثبت بدلون راغلى

مزارشريف (پژواک، ١٧ وږى ٩٤): د  شمال زون د ملګرو ملتونو دفتر )يوناما( وايي چې د تېر کال په پرتله د ښځو په ژوند کې هر اړخيز مثبت بدلون راغلى دى.

په مزارشريف کې د پرانيستې نړيواله ورځ يا Global Open Day د افغان مېرمنو اقتصادي پرمختګ او سولې ته ځانګړې شوې وه.

د همدې لپار په مزارشريف ښار کې د وږي په ۱۷مه د يوناما په دفتر کې غونډه رابلل شوې وه چې د ښځو د چارو په برخه کې دولتي کارکوونکو، مدني فعالانو او د ولايتي شورا ځينو غړو برخه اخيستې وه.

د شمال زون د يوناما وياند لطف الله بارز د يادې غونډې په څنډه کې پژواک ته وويل چې د تېر کال په پرتله د ښځو په ژوند کې هراړخيز مثبت بدلون راغلی دی.

نوموړي زياته کړه چې که څه هم په افغانستان کې د ښځو د حالت د سمونې لپاره لا ډېر کار ته اړتيا ده؛ خو د تېر کال په پرتله تر دې دمه د ښځو هر اړخيز حالت د ډاډ وړ دی.

د هغه په وينا، د تېر کال په پرتله د ښځو پر وړاندې تاوتريخوالی کم شوی، امنيتي حالت يې د ډاډ وړ دی، په دولتي ادارو کې يې شتون ښکاري او په اقتصادي برخه کې يې هم پرمختګونه کړي دي.

خو په بلخ ولايت کې د ښځو د چارو په برخه کې مدني فعالې مېرمن نيلوفر سيار وويل چې لا هم په افغاني ټولنه کې د ښځو حالت د اړتيا وړ مثبت بدلون نه دی کړی.

نوموړي زياته کړه، چې له اقتصادي اړخه لا هم ښځه سړي پورې تړلې پاتې شوي، چې د ژوند نيمايي د پلار په ولکه کې وي او پاتې د خاوند لاس ته ګوري.

د هغې په وينا، د ښځې د هر اړخيز حالت د سمونې لپاره د افغان مېرمنو اقتصادي پرمختګ له ټولو لومړۍ چاره ده چې بايد ترسره شي.

خو د بلخ د ښځو چارې رييسې مېرمن شهلا حديد پژواک ته وويل چې د ښځو د همدې ستونزو د حل په موخه له تېرو څو کلونو افغان دولت او نړيواله ټولنه په ګډه سره کار کوي.

نوموړې د دې پخلی وکړ چې ښځې له ستونزو سره مخ دي؛ خو دا يې هم په ډاګه کړه چې د تېرو کلونو په پرتله اوس افغانه مېرمن له ډېرو لاس ته راوړنو سره ژوند کوي.

د هغې په وينا، په دولتي ادارو کې د مېرمنو شتون، په رسنيو کې فعاله ونډه، په سياست کې ښکېلتيا او نورې ډېرې داسې برخې دي چې پخوا ورسره افغان مېرمنې اشنا نه وې.

 

غړي

You need to subscribe to view the full article. Please login or register a new account.