“افغانستان د پردۍ جګړې په اور کې” کتاب چاپ شو

کابل (پژواک، ٢٢ وږى ٩٤): "افغانستان د پردۍ جګړې په اور کې" کتاب چاپ او بازار ته وړاندې شو.

دغه کتاب د هېواد د وتلي ژورنالېست او ليکوال زبير شفيقي له خوا ليکل شوی، په ښکلي صحافت په ٣٩٢ مخونو کې د اکسوس کتاب پلورنځي له خوا چاپ شوى دى.

په ياد کتاب کې په وروستۍ يوه لسيزه کې د افغانستان په تړاو مهم سياسي مسايل او پېښې د عيني واقعيتونو په رڼا کې څېړل شوي چې لوستونکي پرې په اسانۍ پوهېدلی شي.

تر ټولو مهمه دا چې په دغه کتاب کې د افغانستان د جګړې سيمه ييز او نړيوال لوبغاړي هم معرفي شوي دي.

د کتاب وروستۍ برخه د ولسمشر اشرف غني د حکومت په اړه وړاندوينو او اټکلونو ته ځانګړې شوې ده.

ليکوال زبير شفيقي د دغه کتاب په سريزه کې ليکلي، په دغه کتاب کې په افغانستان کې د روانې لوبې پر څو اړخونو؛ په ځانګړې توګه پر دريو اړخونو چې د افغانستان د غميزو اصلي اړخونه دي، رڼا اچول شوې ده.

هغه زياته کړې، لومړى د ګاونديو په تېره د پاکستان رول، دوهم په بن کې د يوه کمزوري بنسټ اېښودل او د هغو ناخوالې، درېيم د نړيوالې ټولنې په تېره د امريکا اهداف او کړنې.))

شفيقي وايي: ((زه دا ادعا هېڅکله نه شم کولى چې بشپړ د موضوع حق ادا شوى دى.))

د يادونې ده، تر دې مخکې هم د اکسوس کتاب پلورنځي له خوا ګڼ مهم سياسي او علمي کتابونه چاپ شوي دي.

غړي

You need to subscribe to view the full article. Please login or register a new account.