خوست ښار (پژواک، ٨ مرغومى ٩٤): د خوست ښار لوېديځ لوري ته له ازادۍ مېنې د تېر شوي خوړ پر سر چې حلقوي سړک ته څېرمه پروت دی، د دوو پلونو د جوړولو چارې پيل شوې.
د خوست ښاروال انجنير عبدالبصير محمدهارون د کار د پيل پر مهال پژواک اژانس ته وويل، پر دغو پلونو ۱۳ ميليونه افغانۍ لګښت راځي چې د خوست ښاروالي يې ورکوي.
هغه زياته کړه چې د يادو پلونو چارې به په راتلونکو شپږو مياشتو کې بشپړې شي او د کيفيت په برخه کې ترې جدي څارنه کوي.
نوموړي وويل: ((د لومړي پل عرض ۲۰ متره او د دويم پل عرض ۱۲ متره دی، دا د ښار د پراختيا او د خلکو د تګ راتګ په اسانتياوو کې مهم رول لري.))
د خوست والي حکم خان حبيبي د يادو پلونو د بنسټ ډبرې اېښودو پر مهال وويل چې پر جوړېدو سره به يې خوست ښار له ازادۍ مېنې، اداري کمپلکس او د خوست له ملکي روغتون سره ونښلول شي.
نوموړي وويل: ((دغه پلونه زيات اړين دي، د دغو پلونو په نشتوالي سره ازادۍ مېنه او نورې سيمې له ښار سره نه دي وصل. د دې پروژې په بشپړېدو سره به د خلکو ستونزې هوارې شي.))
والي حبيبي دغه راز وويل چې د ښار په نورو سيمو کې هم د دې ډول اړتياوو د پوره کولو لپاره هلې ځلې کوي، تر څو د خلکو لپاره مهمې اسانتياوې رامنځته کړي.
د ازادۍ مېنې يو اوسېدونکي حاجي محمدګل پژواک اژانس ته وويل چې ښار ته د تلو لپاره په اوږده لاره راتاوېږي او دا د وخت د ضايع کېدو لامل ګرځېدلی.
نوموړي وويل چې د دغو پلونو په جوړېدو سره به ښار ته د ازادۍ مينې اوسېدونکو په تګ راتګ اسانتيا رامنځته شي او هم به نور خلک وکولای شي چې اداري کمپلکس او روغتون ته په خپل وخت ورسېږي.
غړيYou need to subscribe to view the full article. Please login or register a new account.
