کابل(پژواک، ۲۷ مرغومی ۹۴):د لوړو زده کړو وزارت وايي، د نوي سيستم په کارولو سره د کانکور په ازموينې کې د ستونزو مخه نيول شوې او راتلونکی کال به ۱۱۸ زره کسان د لوړو او نيمه لوړو زده کړو موسسو ته جذب شي.
د دې وزارت وياند فيصل امين پژواک خبري اژانس ته وويل، چې سږ کال د کانکور ازموينې د کمېټې لپاره داسې ماشينونه لګول شوي چې په کانکور کې يې د درغليو مخه نيولې ده.
هغه زياته کړه:" په تېرو کلونو کې به چې د کومې حوزې لپاره د کانکور ازموينې د پوښتنو کتابچې چاپېدې نو درې ډوله به وې، خو اوس چې په هره حوزه کې هر څومره ګډونوال وي د هغو لپاره ځانګړې کتابچې ورکول کيږي، په داسې ډول چې د کانکور د ازموينې په کتابچه او ځوابونو په پاڼه کې د ځانګړي ای ډي (ID) نمبر ليکل شوی دی."
دى وايي چې د ځينو کتابچو پوښتنې يو شان خو د ډېرو سوالونو ځايونه سره توپير لري تر څو د نقل مخه ونيول شي.
د ده په وينا، تر دې وړاندې به د کانکور د ازموينې له صحنې د ازموينې د پوښتنو د يوې او يا دوو کتابچو په وتلو سره ټوله ازموينه له ستونزو سره مخ کېده، خو اوس د هر شخص لپاره يو ځانګړې د پوښتنو کتابچه په پام کې نيول شوې چې د دې کتابچې په وتو سره د شخص ازموينه له منځه ځي.
د ده د معلوماتو له مخې، سږ کال به شاوخوا ۳۰۰ زره کسان د کانکور په ازموينه کې ګډون وکړي او له دې شمېر څخه به راتلونکی ۱۳۹۵ کال څه باندې ۵۸ زره کسان د لوړو زده کړو دولتي موسسو او ۶۰ زره به د نيمه لوړو زده کړو دولتي موسسو ته جذب شي.
هغه وايي تر اوسه د بادغيس، غور، دايکنډي، باميان، بدخشان، غزني، لوګر، ميدان وردګ او پکتيکا په ولايتونو کې ازموينه اخستل شوې او ډېر ژر به په پاتې ولايتونو کې هم واخيستل شي.
امين زياتوي، کوم کسان چې د کانکور په ازموينه کې بې پايلې اعلانيږي يو شمېر به يې د لوړو زده کړو خصوصي پوهنتونونو او د لوړو زده کړو موسسو ته جذب شي.
خو په دې اړه يې جزئيات ورنه کړل.
غړي
You need to subscribe to view the full article. Please login or register a new account.










