منځپانګې ته تلل
شنبه ۲۱ نومبر ۲۰۲۶ · کابل ۹:۳۳ غ.م
۹°ورېځ · ↑۱۴° ↓۳°د هوا کیفیت: منځنی
غړي

د اوبو د تنظيم او نغلو بند په بيارغونه ١٢٨ ميليونه ډالر لګول کېږي

· ۳ دقیقې لوستل · ۸۳ کتنې

کابل (پژواک، ٤ سلواغه ٩٤): د نړيوال بانک ١٢٨ ميليون امريکايي ډالر نوې مرسته به په افغانستان کې د اوبو د تنظيم او د کابل نغلو برېښنا بند په بيارغونه ولګول شي.

د دغې وړيا مرستې قرارداد، نن د کرنې  او اوبو لګولو وزارت، ماليې وزارت او د افغانستان برېښناشرکت او نړيوال بانک ترمنځ لاسليک شو.

نړيوال بانک د نورو نړيوالو تمويلوونکو په استازيتوب د افغانستان د بيارغونې صندوق د مديريت چارې سمبالوي.

د ماليې وزير اکليل حکيمي وويل، د دې مرستو له ډلې ٤٥ ميليون امريکايي ډالر په کروندو کې د اوبو د تنظيم پروژې کار د دوام او پرمختګ لپاره او ٨٣ ميليونه ډالر د کابل د نغلو بند د بيارغونې په برخه کې لګول کېږي.

د هغه په خبره، اوسمهال دا بند د ٩٦ مېګاواټه برېښنا ظرفيت لري، خو د دې بند د توليد ظرفيت له بيارغونې وروسته به د بند د توليد کچه ٧٥ مېګاواټو ته لوړه شي.

د کرنې، اوبو لګولو او مالدارۍ وزير وويل، په کروندو کې د اوبو د تنظيم پروژه د څلورو کلونو لپاره ده، چې له لارې به يې ١٢٠ د اوبو شبکې بياورغول شي او ١٧٥ به نوې ډيزاين شي.

د هغه په وينا، د دې شبکو په بيارغونې سره شاوخوا ٢٢زره هکتاره ځمکه خړوبېږي او د کابو درې زره هکتاره ځمکې د کمښت ستونزه به حل شي.

هغه وويل،  د دې پروژې په پلي کېدو سره به د اوبو د ١٥ سلنه ضايعاتو مخنيوى وشي او په کرنيزو حاصلاتو کې به ١٥ سلنه زياتوالى راشي.

د هغه په خبره، د دې پروژو له لارې به ١٥زره کسانو ته د کار زمينه مساعده شي.

نوموړي څرګنده کړه چې د يادو شبکو له بيارغونې او ډيزاين سربېره، ٤٥ ميليونه نور ډالر د کرنې وزارت د کارکوونکو او کروندګرو د ظرفيت لوړولو، د اوبو لګولو د ټولنو جوړولو او په دې برخه کې د نوې ټکنالوژۍ د معرفي لپاره ځانګړې شوې دي.

د برېښنا شرکت مشر قدرت الله دلاوري په دې مراسمو کې وويل، له ٨٣ ميليون ډالري مرستې نه چې نن يې قرارداد لاسليک شو، د شپږو کلونو په ترڅ کې به د نغلو بند د بيارغونې او سمبالښت لپاره وکارول شي.

په افغانستان کې د نړيوال بانک مشر رابرټ سام وويل، د دې مرستو موخه د کرنې  او کرنيزو حاصلاتو پياوړتيا او د برېښنا انرژي ته لاسرسى دى.

نوموړي زياته کړه، دا مرستې د افغانستان د بيارغونې صندوق له لارې چې په ٢٠٠٢ کال کې جوړ شوى، ترسره کېږي.

هغه وويل، د ياد شوي صندوق له لارې تر دې وړاندې هم ٤١ميليون امريکايي ډالر په افغانستان کې کروندو ته د اوبو رسولو په برخه کې لګېدلي دي.

د ماليې وزارت د معلوماتو له مخې،  له دې صندوق سره تر اوسه پورې ٣٤ نړيوالو مرستندويانو د ٨.٥ ميليارد امريکايي ډالرو مرستې ژمنه کړې ده.

غړي

You need to subscribe to view the full article. Please login or register a new account.

اړوند خبرونه

ټول کرنه