جلال اباد (پژواک، ۸ سلواغه ۹۴): د خيبر پښتونخوا د عوامي نېشنل ګوند غړو پر وسله والو طالبانو غږ وکړ، چې له وژنو لاس واخلي او له افغان حکومت سره د سولې خبرو ته کېني.
د ياد ګوند يوه چارواکي ارباب محمدطاهر دا څرګندونې په جلال اباد کې د سلواغې په ۸مه، د پاچا خان د اته ويشتم تلين په نمانځغونډه کې وکړې.
له نوموړي سره د ياد ګوند ځينې نور غړي دې غونډې ته راغلي وو، چې له سيمه ييزو چارواکو او فرهنګي شخصيتونو سره يې د پاچا خان پر جدو جهد خبرې وکړې او پر مزار يې ورته د ګلونو ګېډۍ کېښودې.
ارباب محمدطاهر وويل: ((موږ د ولسمشر غني د هغې غوښتنې هرکلى کوو، چې له طالبانو يې غوښتي، څو د سولې بهير ته راشي؛ موږ غواړو وسله وال نور ټوپک کېږدي او له حکومت سره خبرو ته کېني.))
نوموړي يادونه وکړه، چې وسله وال په لر او بر کې د پښتنو وينه تويوي، مشران يې وژني او بچيان يې يتيمان کوي، خو د ده په ټکو، دښمن به په دې کار سره خپلو موخو ته ونه رسېږي.
ده له پښتنو وغوښتل چې د پاچا خان فلسفه تعقيب کړي او عدم تشدد ته مخه کړي.
د ننګرهار والي سليم خان کندوزي د ولسمشر پيغام ولوست، چې په کې د پاچا خان د هڅو او جدو جهد ستاينه او يادونه شوې وه.
د ولسمشر په دې پيغام کې راغلي: ((د پاچاخان هيله دا وه، چې موږ بايد تعليم ته مخه کړو، الحمدالله نن د افغانستان سوونه زره ماشومان ښوونځيو ته ځي.))
د ننګرهار والي برې او لرې پښتونخوا ته په اشارې وويل: ((هلته هم زما بچی او زما مشر وژل کېږي او دلته هم زما بچی او زموږ مشران په نښه کېږي.))
هغه د کوزې پښتونخوا مشرانو ته په اشارې وويل، د پاچا خان پر پوهنتون شوی بريد غندي، خو زياته يې کړه: ((د وژنو مخنيوی په تسليو نه کېږي، دا بريدونه چې هر څوک کوي، بايد له دې عذابه ځان خلاص کړو.))
وروسته د ننګرهار د پوهنتون رييس ببرک مياخېل، يو شمېر فرهنګيانو او ليکوالو په خپلو خبرو کې د پاچا خان د کړو په اړه خبرې وکړې او هغه يې د عدم تشدد سرلاری وباله.
د پاچا خان مزار په جلال اباد کې په پنځه جريبه ځمکه کې اباد دی، چې د مقبرې د جوړولو کارونه يې کابو ۶۰ سلنه پای ته رسېدلي او د چارواکو په وينا، پر نورو برخو يې هم کار روان دی.
غړيYou need to subscribe to view the full article. Please login or register a new account.
