کابل (پژواک، ۸ کب ۹۴): د يوې افغان خصوصي موسسې له خوا د ماشوم له ادبياتو د ملاتړ په موخه مالي صندوق جوړ شو.
" د افغانستان د ماشومانو د ادبياتو کور " په نوم د ياد بنسټ مشر اجمل تورمان نن په کابل کې خبريالانو ته وويل چې د ياد صندوق له پيسو به د ماشوم ادبياتو د ودې لپاره کار واخيستل شي.
دى وايي چې په هېواد کې د ماشوم ادبياتو د ودې لپاره ډېر لږ کار شوى.
هغه وويل چې ياد بنسټ له څلورو کلونو راهيسې د ماشومانو لپاره منظمې کيسې ليکلي، د ماشومانو د ذهني ودې لپاره يې د کانکور ازموينې او مشاعرې جوړې کړي او په دې برخه کې يې ګڼ علمي سيمينارونه جوړ کړي دي.
تورمان له پوهنې وزارت څخه وغوښتل چې د ماشوم له استعداد سره سم د لومړنيو ښوونځيو په کتابونو کې د ماشومانو لپاره اړينو کيسو او شعرونو ته ځای ورکړي.
د ولسمشر فرهنګي سلاکار اسدالله غضنفر وويل، په هېواد کې له پېړيو راهيسې کار روان دی خو د ماشوم، ښځو او ځوانانو د ځانګړو ادبياتو په برخه کې ډېر کار نه دی شوی.
هغه وويل:"زه ددې صندوق له جوړېدو ملاتړ کوم، خو د دې ترڅنګ اړينه ده چې په دې برخه کې کار وشي؛ موږ په دې برخه کې ليکوالانو، اديبانو او هغو کسانو ته اړتيا لرو چې د عمل په ډګر کې موثر ګامونه اوچت کړي."
د ده په وينا، د دې برخې ليکوالان بايد د ماشوم په ژبه د ماشوم له غوښتنې سره سمې ليکنې وکړي.
د اطلاعاتو او فرهنګ وزير عبدالباري جهاني په نننۍ ناسته کې د ياد بنسټ هڅې وستايلې او ويې ويل چمتو دى چې اړينې مرستې ورسره وکړي.
جهاني وويل:"زه د يو ليکوال په توګه د هرې ادبي هڅې ملاتړ کوم، د اطلاعاتو او فرهنګ وزارت لخوا له ياد صندوق سره د ۱۰۰زره افغانيو مرستې اعلان کوم."
د پوهنې وزارت وياند مجيب مهرداد هم په ياده ناسته کې د ماشومانو په برخه کې د افغانستان د ماشومانو د ادبياتو د کور هڅې وستايلې او زياته يې کړه:"د ماشوم ادبيات د پوهنې له نصاب سره مستقيمې اړيکې لري او موږ به په دې برخه کې ګټور ګامونه اوچت کړو."
غړيYou need to subscribe to view the full article. Please login or register a new account.
