د کندهار يوه هټۍ واله: د خاوند او دوو ځوانو زامنو مړينې پر ملا ماته کړم خو ناهيلې نه شوم

کندهار (پژواک ٢٣ غويى ٩٥): د کندهار ښار شهيدانو څلور لارې ته څېرمه پر عمومي سړک د ګڼو دوکانونو له منځه د خوراکي توکو يو دوکان بېخي له نورو بېل دى، په دغه دوکان کې د معمول خلاف يوه مېرمن د سودا په ورکولو بوخته ښکاري.

دغه زړه مېرمن چې په څېره کې يې ستړيا او کړاو له ورايه ښکاري، بي بي ګله نومېږي چې خپل عمر تر ٥٠ کلونو پورته ښيي او له کافي ډېرو کلونو په همدې ځاى کې د خوراکي توکو دوکان کوي.

دا وايي، د خاوند او دوو ځوانو زامنو مرګ که څه هم دا پر ملا غوټه ماته کړه، خو ناهيلۍ ته يې ځان ور نه کړ او نه هم د نورو د اوږو بار شوه، بلکې د خپلې کورنۍ د پايښت په موخه يې په خپله کار او روزګار ته اوږه ورکړه.

بي بي ګلې له پژواک خبري اژانس سره په ځانګړې مرکه کې وويل، خاوند يې کلونه وړاندې د  روسانو د يرغل پر مهال په يوه جګړه کې وژل شوى او دا په ځوانۍ کې کونډه شوې ده.

هغې زياته کړه: ((خاوند مې له ښاره کور ته روان و چې د مجاهدينو او روسانو تر منځ جګړه ونښته، هغه په مرمۍ ولګېد او سخت ټپي شو، پوره درې ورځې په روغتون کې و، خو ژوند ورسره ياري و نه کړه او مړ شو.))

د دې په خبره، د ژوند د ملګري له مړينې وروسته يې د ژوند سختې ورځې پيل شوې، خو هغې همت و نه بايله او له هماغه پيله په دې فکر کې شوه، چې څنګه د خپلو اولادونو پالنه او ساتنه وکړي.

بي بي ګله د مرکې پر مهال يوه شېبه غلې شوه او وروسته يې په دردېدلي غږ زياته کړه: ((تقدير له ما څخه يواځې زما خاوند بېل نه کړ، بلکې شاوخوا اووه کلونه مخکې يې له ما څخه زما دوه ځوانان زامن هم د تل لپاره جلا کړل.))

دې وويل، زامنو يې له کندهاره هرات ته سفر کاوه چې د لارې په اوږدو کې يې د سورلۍ موټر ټکر وکړ او دواړه په کې ځاى پر ځاى ووژل شول.

دا وايي، نه يې لکه د سلګونو زرو نورو افغانانو په څېر وطن پرېښود او نه يې هم چا ته د مرستې لپاره لاس اوږد کړى، بلکې هر ډول ناخوالې يې په ځان ومنلې او خپل ژوند يې خپلو پاتې اولادونو ته وقف کړ.

نوموړې زياتوي، د ژوند له دغو درنو حادثو وروسته يې په پيل کې په همدې ځاى کې د سړک پر غاړه شړومبې پلورلې او له دې لارې يې خپلو وړو ته نفقه برابروله، خو له ډېر وخت او کړاوونو وروسته وتوانېده چې دغلته د خوراکي توکو دوکان پرانيزي.

د کندهار دغه يواځينۍ ښځينه دوکانداره وايي، د دوکان په جوړولو کې ورسره هېچا مرسته نه ده کړې، بلکې د شړومبو د پلورلو له لارې يې يوه- يوه افغانۍ ټوله کړې او دغه وړوکى دوکان يې پرې جوړ کړى دى.

دغه مېرمن کلونه وروسته، اوس د ١٦ کسيزې کورنۍ (دوو زامنو، يوې واده شوې لور، دوو نږيندو او وړو لمسيانو) مشره ده چې د ټولو لګښت برابروي.

خو هغې په ډېر افسوس دا يادونه هم وکړه چې د خاوند او دوو ځوانو زامنو تر مړينې وروسته يې دوه ځوان زامن په نشو روږدي دي او د هېڅ کار او روزګار نه دي.

دې وويل: ((د پلار تر مرګ وروسته مې داسې څوک نه لرل چې زامن مې له بې لارو ملګرو راوګرځوي، ځکه خو په نشو اخته شول، ما له نشو څخه د راګرځولو لپاره هغوى ته ودونه وکړل او فکر مې کاوه چې په دې توګه به هغوى سم شي، خو و نه شوه او ستونزې نورې هم ډېرې شوې.))

دا وايي، لويه هيله يې دا وه چې زامن به يې ځوانان شي، د کار او روزګار به شي او پر هغې تېر شوي کړاوونه او دردونه به له منځه لاړ شي، څو دا د ارام کولو او د خپلو لمسيو د پاللو فرصت تر لاسه کړاى شي، خو له بده مرغه داسې و نه شول.

دې په ګيله من اندازه زياته کړه، کلونه مخکې چې يې خاوند مړ شوى و او اولادونه يې واړه وو، نو هم کار کولو ته مجبوره وه او اوس چې زامن يې ځوانان شوي، نو هم مجبوره ده چې کار وکړي.

خو دې يادونه وکړه چې له هر راز دردونو، کړاوونو او ستونزو سربېره ناهيلې شوې نه ده، بلکې دا هر څه اوس هم د دې لپاره زغمي چې د اولادونو او لمسيانو پالنه وکړي، په هغوى زده کړې وکړي او له هغوى څخه د وطن او خلکو خدمتګاران جوړ کړي.

دې خوښي وښودله چې په دوکان کې دومره ګټه وټه تر لاسه کوي چې خپلې کورنۍ پرې وساتي، څو نه دا او نه يې د کورنۍ نور غړي سوال کولو ته اړ شي.

دا خپل ژوند ته په کتو پر خلکو او په ځانګړې توګه پر مېرمنو غږ کوي چې د هر راز سختيو او ستونزو پر مهال دې حوصله او زغم له لاسه نه ورکوي، بلکې راتلونکې ته دې هيله مند و اوسي او په دې توګه دې د مخکې تلو لپاره هڅه او حرکت کوي.

نوموړې دا هم وايي چې تل تر پنځه وخته لمانځه وروسته په هېواد کې د سولې او ارامۍ دعا کوي او په دې ارمان ده چې ټوله وګړي په خپل هېواد کې ارام ژوند ولري.

ګڼ خلک د بي بي ګلې همت ستايي او وايي، دا ځکه د ډېرې ستاينې وړ ده چې يوه ښځينه ده او په داسې حال کې چې ډېرې سختۍ او خوارۍ پرې راغلي، خو بيا يې هم خپل همت له لاسه نه دى ورکړى او له هر ډول کړاوونو سره يې په يواځې ځان مقابله کړې ده.

عبدالرحمن چې د هغې دوکان ته څېرمه اوسېږي، پژواک اژانس ته وويل، د کور لپاره يواځې له بي بي ګلې سودا اخلي او دغه راز نورو ته هم تل يادونه کوي چې يواځې له همدې دوکانه سودا واخلي.

دى زياتوي، وګړي بايد د دغې زړورې مېرمنې تريخ ژوند د ځانونو لپاره يوه نمونه وګرځوي او په دې فکر کې نه شي چې هر څه بايد نور ورته وکړي.

د ده په وينا، بريالي خلک هغه دي چې په هر ډول سختو حالاتو کې په خپله لاس په کار شي، نوښت وکړي، کلک هوډ ولري او د ځان او کورنۍ لپاره يو څه وکړي.

د ده په خبره، په دې توګه به په خلکو کې ټولنيز شعور را بيدار شي، د دې پر ځاى چې هېواد پرېږدي، سوال کوي او يا هم په تشدد او نورو بې لاريو لاس پورې کوي، د خپلې ټولنې او هېواد د ابادۍ لپاره به مټي راونغاړي او نورو ته به هم د ژوند هيلې وبښي.

غړي

You need to subscribe to view the full article. Please login or register a new account.