منځپانګې ته تلل
شنبه ۲۱ نومبر ۲۰۲۶ · کابل ۹:۳۳ غ.م
۹°ورېځ · ↑۱۴° ↓۳°د هوا کیفیت: منځنی
غړي

په هېواد کې د اوبو لګونې ٢٠ پروژې بيارغول کيږي

· ۲ دقیقې لوستل · ۸۰ کتنې

کابل(پژواک، ١١غبرګولى ٩٥): د کرنې، اوبو لګونې او مالدارۍ وزارت د کرنيزو ځمکو د ښې اوبو لګونې په موخه د اوبو لګونې ۲۰ پروژو د بيا رغونې تړون د هېواد له خصوصي سکتور سره لاسليک کړ.

د دغو پروژو هوکړه ليک نن په کابل کې د ياد وزارت د لوړپوړو چارواکو او د خصوصي سکتور تر منځ لاسليک شو.

د کرنې، اوبو لګولو او مالدارۍ وزير اسدالله ضمير د يادو پروژو تر لاسليک کېدو وروسته رسنيو ته وويل چې يادې شبکې د هېواد په پنځو ولايتونو کې بيارغول کيږي.

د وزير په وينا، د پروژو د کار له بشپړېدو سره به په ټوليز ډول ٤٣٠٠ جريبه ځمکه خړوبه او ٢٦٠٠ کورنۍ به ګټه  ورڅخه واخلي.

د هغه په وينا، له يادو ۲۰ پروژو څخه پنځه به يې د بغلان ولايت په کليو ، يوه پروژه به يې په کاپيسا، دوه پروژې به يې د کونړ، ۱۲ پروژې به يې د لغمان او ننګرهار په ولايتونو کې ورغول شي.

دی زياتوي، د يادو پروژو د رغونې کار به د روان کال تر پايه پورې بشپړ شي.

د ده په وينا، د يادو پروژو پر رغولو ۱۴۶ ميليونه افغانۍ لګښت راځي چې د ياد وزارت له پراختيايي بوديجې څخه ورکول کيږي.

د کرنې وزير وويل چې د دغو پروژو پر بشپړيدو سره به ۷۰ سلنه د اوبو د ضايع کېدو مخه ونيول شي او په کروندو کې به ۲۰ سلنه ډېروالی چې له مخې به يې د کروندګرو ۲۰ سلنه اقتصاد پياوړی شي.

هغه وويل، د يادو پروژو د پلې کېدو چارې د خصوصي سکتور لخوا تر سره کيږي او ټينګار کوي چې د پروژو کاري کيفيت په جدي ډول سره کنټرول او څېړل کېږي.

دا په داسې حال کې ده چې ياد وزارت په پام کې لري چې د روان کال په لړ کې ورته ۹۱ د اوبو پروژې د هېواد په ۱۶ ولايتونو کې ورغوي.

غړي

You need to subscribe to view the full article. Please login or register a new account.

اړوند خبرونه

ټول کرنه