ښرنه (پژواک، ١٧ چنګاښ ٩٥): د پکتيکا په مټاخان ولسوالۍ کې يوه ښوونکي پر خپل شخصي لګښت سلګونو ماشومانو ته د زده کړې زمينه برابره کړې ده.
د مټاخان ولسوالۍ د ښوورکچې سيمې اوسېدونکي او ښوونکي ٥٥ کلن خيال محمد پژواک خبري اژانس ته وويل چې له کلونو راهيسې د دې سيمې ټول اوسېدونکي له زده کړو محرومه وو.
ده وويل: ((د پوهنې رياست او نورو چارواکو د نا امنۍ له امله نه شو کولاى چې په دې سيمه کې مکتب جوړ کړي ما په شخصي لګښت او چاندو دلته مکتب جوړ کړى دى.))
هغه وايي چې د ياد ښوونځي ٨٠ سلنه چارې بشپړې شوې دي خو د بوديجي د نه شتوالي له امله يې اوس چارې درولې دي.
د استاد خيال محمد د معلوماتو له مخې، اوسمهال په دغه ښوونځي درې سوه زده کوونکي زده کړې کوي.
هغه زياته کړه: ((دې شاګردانو زه خپله، د کلي ملا صاحبان او ځيني نور باسواده کسان په وړيا توګه په وار وار د ټولو مضامينو درس ورکوو.))
ده وويل چې دغه پروسه يې درې کاله وړاندې پيل کړې ده او زده کوونکو ته تر شپږم ټولګي پورې زده کړې ورکوي.
په دې اړه د مټاخان ولسوالۍ اوسېدونکي عبدالقهار پژواک ته وويل چې استاد خيال محمد له کلونو راهيسې په بېلابېلو سيمو کې د استادۍ دنده ترسره کړې ده.
هغه وويل: ((اوس يې په خپل شخصي لګښت او چاندو يو شپږ خامه اتاقونه جوړ کړي او سلګونو ماشومانو ته په کې زده کړې ورکوي الله ج دې خير ورکړي.))
ده وويل چې د مټاخان ولسوالۍ د ښوورکچې سيمې اوسېدونکي له استاد خيال محمد څخه ډېر خوښ دي او په دې برخه کې همکاري هم ورسره کوي.
دغه راز د پکتيکا والي الياس وحدت د استاد خيال محمد په اړه پژواک ته وويل: ((دا استاد ما ته راغلى وو او ورسره ومې ليدل او دا چې دې استاد ډېر ستر کار کړى ما خپل د سر لونګۍ ورته په سر کړه.))
د وحدت په وينا، له استاد خيال محمد سره يې په ياده برخه کې د هر راز مرستې ژمنه کړې ده.
هغه زياته کړه: ((زه پلان لرم چې په دغه ولايت کې د پوهنې د پرمختيا لپاره پوره هلې ځلې وکړم.))
وحدت شاوخوا لس ورځې وړاندې د پکتيکا د والي په توګه دنده پيل کړه.
د پکتيکا د پوهنې رييس کوچي ځاځي پژواک ته وويل چې د نا امنۍ له امله په ښوورکچې سيمه کې ښوونځى نشته.
ده وويل چې د استاد خيال محمد ښوونځى تر اوسه له دوى سره ثبت نه دى خو تر دې وروسته به يې ثبت کړي.
د هغه په وينا، دوى پلان لري چې په يو شمير نورو نا امنو سيمو کې هم زده کوونکو ته د قومي مشرانو په همکارۍ د زده کړو زمينه برابره کړي.
غړيYou need to subscribe to view the full article. Please login or register a new account.










