پل علم (پژواک، ٢٠ زمرى ٩٥): د لوګر مسوولين وايي، په ازرې ولسوالۍ کې د پاکستانۍ چورلکې په پېښه کې د تښتول شوو کسانو د خلاصون لپاره د پاکستان حکومت يو پلاوى دې ولسوالۍ ته استولى دى.
دې چورلکې د زمري په ١٤مه د ازرې ولسوالۍ په مربوطاتو کې د تخنيکي ستونزو له امله بېړنۍ ناسته کړې وه.
د لوګر د ولايتي شورا غړي او د ازرې اوسېدونکي عبدالولي وکيل د زمري په ٢٠مه پژواک خبري اژانس ته وويل چې د يادو کسانو د خلاصون لپاره د افغان پلاوي او وسله والو طالبانو تر منځ خبرې په ټپه ولاړې دي.
ده زياته کړه، په پېښور او کوېټې کې د وسله والو طالبانو شوراګانو په ازره کې پر طالبانو فشار راوړى، تر څو نيول شوي کسان د پاکستان حکومت ته وسپاري.
د هغه په وينا، د يادو کسانو د خلاصون په موخه د پاکستان حکومت پرون يو پلاوى ازرې ولسوالۍ ته استولى دی، تر څو له طالبانو سره نېغ په نېغه خبرې وکړي.
وکيل وايي، په دغه پلاوي کې د ډيورند کرښې اخوا قومي مشران، ځيني افغانان، د پاکستان د پوځ د وياند مرستيال او ځيني نور کسان شامل دي.
خو نوموړي په دې اړه چې دغه معلومات يې له کوم ځايه ترلاسه کړي، له څه ويلو ډډه وکړه.
دغه راز د ازرې ولسوال حميدالله حميد هم وويل چې پاکستان د تښتول شوو کسانو د خلاصون لپاره يو پلاوى استولى دى.
هغه زياته کړه، د يادو کسانو پر سر د طالبانو ترمنځ اختلافات هم را پيدا شوي چې له امله يې له افغان پلاوي سره خبرې هم بندې کړې دي.
دى وايي: ((يوه ډله طالبان وايي چې دغه کسان افغان حکومت ته سپارو، بله ډله يې وايي چې د پاکستان حکومت ته دې وسپارل شي، خو بله ډله بيا وايي چې له پاکستان سره بايد د بنديانو د خلاصون لپاره دغه کسان تبادله شي.))
حميد دا هم وويل چې نيول شوي کسان تر اوسه روغ او جوړ دي او د طالب قوماندانانو ملا شېرين او ملا ولي له لوري په پټ ځاى کې ساتل کېږي.
خو د بهرنيو چارو وزارت وياند شکيب مستغني پژواک اژانس ته وويل، چې دوى په رسمي توګه د پاکستاني پلاوي له راتګ څخه خبر نه دي.
وسله والو طالبانو د يادو کسانو په اړه تر اوسه رسنيو ته څه نه دي ويلي.
څو ورځې وړاندې د پاکستان د پوځ مشر جنرال راحيل شريف ولسمشر اشرف غني او په افغانستان کې د ناټو ځواکونو قوماندان جنرال نيکولسن سره ټيلېفوني خبرې وکړې او له هغوى يې غوښتي چې د يادې چورلکې د تښتول شوو کسانو په خوشي کولو کې ورسره همکاري وکړي، چې دواړو راحيل شريف ته ډاډ ورکړى چې په دې برخه کې به اړينه همکاري کوي.
ازره د لوګر له نا امنو ولسواليو ده چې له تېرو ١٤ کلونو راهيسې يې لويه لار له مرکز پل علم سره تړل شوې ده.
غړيYou need to subscribe to view the full article. Please login or register a new account.
