منځپانګې ته تلل
چهارشنبه ۱۸ نومبر ۲۰۲۶ · کابل ۳:۲۲ غ.و
۱۴°صاف · ↑۱۴° ↓۱°د هوا کیفیت: منځنی
غړي

په ننګرهار کې د داعش مېشتو سیمو ۲۵ ښوونځي تړلي

· ۳ دقیقې لوستل · ۷۰ کتنې

جلال اباد (پژواک، ۱۵ وږی ۹۵): په ننګرهار ولايت کې نوى ښوونيز کال په داسې حال کې پيل شو چې اوس هم د دغه ولايت په داعش ځپلو څلورو ولسواليو کې ۲۵ ښوونځي د زده کوونکو پر مخ تړلي پاتې دي.

د ننګرهار د تودو سيمو لپاره نوی ښوونيز کال د وږي په ۱۵مه په جلال اباد ښار کې د دغه ولايت پوهنې رياست مسوولينو له لوري د ښوونځي د زنګ په وهلو پيل شو.

د پوهنې رياست مطبوعاتي مسول محمد اصف شينواري پژواک خبري اژانس ته وويل چې د ننګرهار ولايت له ۹۰۳ ښوونځيو څخه لا هم ۲۵ ښوونځي د داعش وسله والې ډلې له وېرې تړلې پاتې دي.

نوموړى وايي، د يادو ښوونځيو د تړل کېدو له امله د شاوخوا ۲۰ زره زده کوونکي يا بېخي له زده کړو محروم شوي او يا هم د امن سيمو ښوونځيو ته لېږدول شوي دي.

شينواري زياته کړه: ((په اچين، هسکې مېنې، کوټ او پچير اګام ولسوالۍ ښوونځي تړل شوي چې د شل زره په شاوخوا کې زده کوونکي يې له امله له زده کړو بې برخې دي.))

بلخوا د ننګرهار د ولايتي شورا غړي اسرارالله مراد د پوهنې پر رياست او ولایتي ادارې نيوکه وکړه چې د تړلو ښوونځيو د پرانيستلو لپاره يې هېڅ ګام نه دی پورته کړی.

هغه زياته کړه: ((په ځلونو مو د ننګرهار له ولايتي ادارې سره دا ستونزه شريکه کړې؛ خو زموږ د اولادونو دا حياتي موضوع تر اوسه نه ده حل شوې.))

مراد وايي، که حکومت په ننګرهار کې د دغو ۲۵ ښوونځيو د بيا پرانيستلو په اړه هڅې ونه کړي؛ نو د ننګرهار شاوخوا شل زره نجونې او ځوانان به بې زده کړو را لوی شي.

دغه راز د ننګرهار د هسکې مېنې ولسوالۍ د اوغز سيمې يو اوسېدونکى حسيب الله وايي، اولادونه يې له تېرو دوو کلونو راهيسې له زده کړو محروم دي.

هغه پژواک اژانس ته وويل، د اتو اولادونو له ډلې يې اوس يوازې يو زوی پر زده کړو بوخت دی چې هغه هم په جلال اباد ښار کې زده کړې کوي.

د ننګرهار د پوهنې رياست علمي مرستيال اول ګل ابو زاهد که څه هم په ننګرهار کې د ښوونځيو تړل کېدل او د خلکو شکايتونه مني؛ خو وايي، دوی په دې اړه د سيمې له مخورو، امنيتي ځواکونو او ولايتي ادارې سره په ګډه هلې ځلې پيل کړې دي.

د نوموړي په وينا، تر هغه وخته چې په يادو ولسواليو کې امنيت تامين نه شي؛ نو د ښوونځيو د بيا پرانيستل کېدو لپاره هڅې پايلې نه ورکوي.

د ننګرهار د والي وياند عطاءالله خوږياڼي بيا په ولسواليو کې د امنيتي وضعيت خرابوالی د ټول هېواد امنيت په خرابوالي پورې تړلی وباله او د ښوونځيو د تړل کېدو په اړه يې وويل چې هلې ځلې يې پيل کړې دي.

هغه پژواک ته وويل، ولايتي ادارې څو ځله د قومي مشرانو په منځګړتوب هلې ځلې کړې او هيله يې څرګنده کړه چې په نږدې راتلونکې کې په دې برخه کې يو بدلون رامنځته شي.

د پوهنې ریاست د معلوماتو له مخې، په ننګرهار کې شاوخوا ۹۰۳ د نجونو او هلکانو ښوونځي موجود دي چې له ډلې یې ۵۳۱ ښوونځي په تودو سيمو کې دي.

د يادونې ده، اوسمهال په ټول ننګرهار کې له درې سوه زره د زياتو نجونو په ګډون، شاوخوا ٩٢٠زره زده کوونکي پر زده کړو بوخت دي.

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه