جلال اباد (پژواک، ٢٠ تله ٩٥): چارواکي وايي چې ډېر ژر به په ننګرهار ولايت کې د سعودي عربستان د ٥٠٠ ميليونه ډالرو په مرسته د نړيوال اسلامي پوهنتون چارې پيل شي.
د ننګرهار د والي وياند عطاءالله خوږياڼي د تلې په ٢٠مه پژواک خبري اژانس ته وويل چې دغه اسلامي پوهنتون د روداتو ولسوالۍ د غازي امان الله خان ښارګوټي ته څېرمه په زر جريبه ځمکه کې جوړېـږي.
هغه زياته کړه چې په دغه پوهنتون کې به د افغانستان په ګډون د نورو اسلامي هېوادونو محصلين هم د ليسانس، ماسټرۍ او دوکتورا په کچه زده کړې کوي.
خوږياڼي وويل چې نن د ولايت د مرستيال محمدحنيف ګرديوال په مشرۍ د دغه پوهنتون د جوړېدا په اړه تدابيري غونډه جوړه شوې وه.
د هغه په وينا، په دې غونډه کې د لوړو زده کړو وزارت استازو، د پوهنتون مسوولينو، د ولايتي شورا استازو، د امنيتي ځواکونو قوماندانانو، د بټي کوټ، کوټ او روداتو ولسواليو امنيه قوماندانانو، ولسوالانو، قومي مشرانو او د مدني ټولنو استازو برخه لرله.
د ولايت مرستيال محمدحنيف ګرديوال وويل چې د ننګرهار د خلکو او ولايتي ادارې په هڅو په ننګرهار ولايت کې دغه اسلامي پوهنتون منظور شوی او ژر دی چې د جوړېدو عملي کارونه يې هم پيل شي.
د هغه په وينا، دغه پوهنتون په نړيواله کچه جوړېږي چې د هېواد پر بچيانو سربېره د نورې اسلامي نړۍ ځوانان به هم په کې زده کړې کوي.
ګرديوال وويل چې د دغه پوهنتون د جوړېدو په مراحلو کې به د نورو سيمو تر څنګ د رودواتو، کوټ او بټي کوټ ولسواليو ځوانانو ته د کار زمينه برابره او اقتصاد به يې پياوړی شي.
ده د ټولو امنيتي ادارو، د يادو لسواليو له خلکو او مدني فعالانو څخه غوښتنه وکړه چې د پوهنتون په جوړېدو کې همکاري او ملاتړ وکړي.
ګرديوال د شرکت مسوولينو ته لارښوونه وکړه چې ژر تر ژره دې د ياد پوهنتون د جوړېدو چارې په معياري توګه پيل کړي.
د لوړو زده کړو وزارت استازي پوهاند امين وويل چې د لوړو زده کړو وزارت پلان لري چې سږ کال په کندهار کې د کرنې نړيوال پوهنتون او په ننګرهار کې نړيوال اسلامي پوهنتون د جوړېدو چارې پيل کړي.
نوموړي زياته کړه، د دغه اسلامي پوهنتون جوړولو لپاره يې لسګونه کاله وړاندې هم هڅې پيل شوې وې چې د يو لړ ستونزو له امله په ګاونډي هېواد پاکستان کې جوړ شو.
ده له ټولو ننګرهاريانو مننه وکړه چې د اسلامي پوهنتون غوښتونکي وو او هيله یې څرګنده کړه چې د پوهنتون په جوړولو کې بشپړ ملاتړ وکړي.
د ننګرهار پوهنتون رييس ببرک مياخېل وويل چې نړيوال اسلامي پوهنتون د پنځه سوه ميليونه ډالرو په لګښت په زر جريبه ځمکه کې په اساسي ډول جوړېږي.
د هغه په وينا، د نړيوالو د مرستو د جلبولو په موخه د لوړو زده کړو وزارت په پيل کې د دغه پوهنتون ودانۍ لپاره بوديجه منظور کړې او د جوړېدو پلان يې بشپړ شوی دی چې ډېر ژر به يې د جوړونې چارې عملاً پيل شي.
د دې غونډې پر مهال د يادو ولسواليو قومي مشرانو، مدني فعالانو د خپلو ويناو پر مهال په ننګرهار د نړيوال اسلامي پوهنتون پر جوړوېدو خوښي څرګنده کړه او ډاډ يې ورکړ چې د پوهنتون جوړېدو او امنيت ساتلو کې به يې ونډه واخلي.
دوی غوښتنه وکړه چې ياد پوهنتون دې د انجينرۍ په معيار برابر جوړ شي او د يادو ولسواليو ځوانان دې د کار کولو په موخه ونيسي.
دغه راز د امنيتي ځواکونو مسوولينو په لوړ مورال سره ډاډ ورکړ چې د دې پروژې د امنيت تامين په موخه به نه ستړي کېدونکې هڅې کوي هر هغه څوک چې د دې پروژې د ځنډ او خنډ سبب وګرځي قانوني چلند به ورسره تر سره کړي.
غړيYou need to subscribe to view the full article. Please login or register a new account.









